Shillong, K’lyngkot, 31: Ka kynhun ki nongwad bniah na ka Zoological Survey of India (ZSI), Kolkata dang shen ki la lap ïa ki jait Thapbawa ba thymmai kiba shu kynthih na kawei ka kper slasha Ribhoi District, Meghalaya.
Kine ki Thapbawa ba la tip kyrteng kum ki “Phintella handersoni” la lap na kper slasha Anderson Tea Estate, kaba don ha Umran Dairy, Ri-Bhoi district, Meghalaya, bad la jer kyrteng ïa kane ka thapbawa kum ka jingai burom ïa u Bah Handerson Syiemlieh, u trai jong ka kper Slasha.
Ka Phintella, ka kham rit ha ka met bad ka don rong ba kham shai rong bad rong nar ktieh. Kane ka thapbawa ka kham pyllun na ki bynta jong ka khlieh, katba ka kpoh ka long shalytuiñ kum ka pylleng.
Kane ka kynhun ki Researcher ba la ïalam da u Dr. Souvik Sen, Zoological Survey of India (ZSI), Kolkata, u Dr. Sudhin P. P. na ZSI, Kolkata bad u Dr. John T. D. Caleb na Saveetha University, Chennai ki la ïashim bynta ha kane ka jingwad bniah shaphang kine ki thapbawa.
Ka jingshem thymmai ïa kine ki jait thapbawa na Meghalaya la pynmih dang shen ha ka thup 100(1) jong ka International Journal ba pawnam kaba la tip kyrteng kum ka `Zoosystematics and Evolution’.
U Dr Dhriti Banerjee, uba dei u Director jong ka ZSI u la ong ba ki thapba ki dei kiba im bha ha ki jaka sngem ha ki kper slasha.
Ki khun bad ki khun ksiew jong u Bah (L) Handerson Syiemlieh ki dap da ka jingsngewkmen shaphang kane ka jinglap ïa kine ki jait thapbawa thymmai bad ai jingïaroh ruh ïa ka jingtrei jong ka kynhun ZSI ba la ïalam da u Dr. Sen.
Ki la pynpaw ruh ka jingkyrmen ba kane ka kynhun kan nang lap thymmai shuh shuh ïa kiwei pat ki jait mrad ha ki jaka rilum jong ka jylla Meghalaya.
