Syrtok ki paidbah ba leit ba la sniew palat ka surok na Umïam shaduh sha Mawiong

0

Nongpoh, Risaw 12: Ka jingsniew palat ka surok na Umïam sha Mawiong ban leit sha Nongbah Shillong ka la wan rah shisha ka jingeh kaba khraw bad bun na ki paidbah nongleit nongwan lyngba kane ka surokbah ki la pynpaw ka jingsngewkhia kaba jur halor ka jinglong jingman jong kane ka surok.
Haba kren halor ka surok, ki paidbah naduh na Guwhati ban ïaid lyngba ka Ri Bhoi District ki dap shisha da ka jingkmen ban ïaid ban ieng da ka jingdon ka surok 4-lane ha Ri Bhoi, hynrei tang shu lait na Ri Bhoi District ban leit sha Shillong kiba bun ki nongleit nongwan ki la pynpaw ka jingeh kaba khraw na ka daw ka jingsniew palat ka surok kaba haduh mynta ym shym la don kano kano ka jingmaramot ne pynbha ïa katei ka surok ban ïaid sha Nongbah Shillong.
Kumba la sakhi bad iohi ka jinglong kane ka surok ka la dap da ki thliew ki syar suda ha shi lynter ka surokbah na Umïam sha Mawiong bad tang ka daw ka jingsniew kane ka surok ka la wan rah ruh ka jingdheng kali kaba ktah ïa ki nongleit nongwan.
La sakhi ruh ba kane ka jingsniew ka surok ka dei kaba la slem bha ha kaba naduh ki nongñiah kali bad wat ki paidbah nongleit nongwan ki la khñiu bad ud na ka por sha ka por bad teng teng tang na ka jingsniew ka surok ka la wan rah ka jingjia ba sngewsih bad ka jingdheng ki Kali paidbah ba ïaid lyngba kane ka surok.
Shuh shuh, kumba la lap ne sakhi ha kine ki sngi dei tad haduh ba kiba bun ki paidbah ki la ud la nam halor ka jingsniew kane ka surok ba ka sorkar mynta ka la sdang ban tih ïa kitie ki jaka ba sniew na ka bynta ban siang rong bad namar ka jingrit ka surok na ka daw ka jingtih ïa ka surok da ki puh shilum (JCB) ha ka por mynsngi ka la wan rah pat ka jingdheng kali kaba pynjynjar arshah ïa ki paidbah nongleit nongwan.

Leave A Reply

Your email address will not be published.