Nongpoh, Risaw 12 : Sa tang katto katne bnai kan poi sha ka samoi ba ki paidbah kin pynthymmai baing ïa ki nongmihkhmat na ki Constituency bapher bapher hapoh ka jylla sha ka ïing Dorbar Thaw Aiñ ka jylla bad kumba long mynta haba phai sha ka Umsning Constituency ha Ri Bhoi ki la sdang mih ki kyrtong kiba thmu ban ïa aireng ha kane ka kynti na katei ka Constituency kaba dang dei kawei na ka Constituency kaba dang mih thymmai ha Ri Bhoi.
Haba phai halor ka jinglong jingman na ka bynta ka jingpynkhreh ban aireng ha kane ka Constituency ki la don haduh 6 ngut ki kyrtong kiba la paw pyrthei bad kiba thmu ban aireng ha kane ka election 2023 na ki party bapher bapher.
Kitei ki 6 ngut ki kyrtong kiba la thikna ban ïakhun ha kane ka election 2023 na Umsning Constituency ki kynthup ïa u Dr. Celestine Lyngdoh na ka party Congress (INC), u Bah Jason S. Mawlong na ka party NPP, u Bah Sunshine Makri na ka party UDP, u Bah Primson Makdoh na ka party HSPDP, U Bah Donlang Sohkhlet na ka party PDF bad u Dr. Ricky A.J Syngkon na ka party VPP kaba dei kawei na ka party ba dang mih thymmai hapoh ka jylla Meghalaya.
Kumba long haduh mynta lait na kitei ki 6 tylli ki party ka dang don ruh ka ham saïa ban dang mih sa kiwei ki party kum ka party AITMC bad ka party BJP ha kaba haduh mynta ym pat paw satia ïano kitei ki party kin pynieng lane ban pynlong kum u kyrtong ban aireng ha kane ka election 2023 na Umsning Constituency.
Haba kren halor ka jinglong jingman kane ka election ban sa wan jong u snem 2023, na katei ka Constituency, ki party kiba la kham paw bad kiba la thikna ba ki kyrtong kin aireng bad kiba la sdang ruh ban khieh ban ksar ban pynkhlaiñ ïa ka party ki kynthup ïa ka party NPP, PDF, INC, HSPDP bad UDP bad kiwei ki party kim pat da kham paw bad wat la katta ruh haduh kine k sngi ym pat lah ban tip kino napdeng kine ki party kiba poi sh ka jingjop ha kaba ka jingpan jingkyrshan na ki paidbah lyngba ki kyrtong ka dang ïaid napoh napoh bad kam pat da paw pyrthei satia haduh katta katta.
