Shillong, Rymphang, 01: Kum shibynta ban tehlakam ïa ka jingïoh kamai laitluid ki bar jylla kiba shong basah hapoh ka jylla Meghalaya bad kumjuh kiba bylla ñiah kali Tourist na Shillong sha Guwahati kiba pyndonkam da ki kali ba don ïa u number ML, ha ka sngi Palei ka Hynñiewtrep Integrated Territorial Organisation (HITO) Shillong City ka la pynlong ïa ka jingkhynra ïa ki Trading Licence bad Labour Licence ha Inter State Buss Terminal (ISBT) Mawiongrim da ka jingsynran lang jong ki Pulit ka Mawlai Police Station bad ki Enforcement ka Khasi Hills Autonomous District Council (KHADC).
Ha ka jingïakren bad ki lad pathai khubor, u President ka HITO Shillong City samla Banpyntngenlang Syiemlieh u la ong ba ka jingtalasi ïa ki kot ki sla jong ki bar jylla ka dei namarba bunsien ki briew kiba nabar da kaba suk ki kamai jakpoh hapoh ka jylla, katba ki trai ri trai muluk pat ki mad jingeh ha kamai kajih namar ki shah knieh lut ha ki bar jylla.
Ha kane kajuh ka sngi, katba ki dkhot ka seng ki dang wan phai ha ISBT, ki la ïoh bat ïa kumba 18 ngut ki bar jylla kiba wan na ka jylla Assam kiba thmu ban trei bylla sngi sha kane ka jylla Meghalaya.
Ïa kine ki bar jylla, ka seng ka la ïoh bat katba ki dang ïaid lynti na surok VIP Road ha ka shnong Mawkynroh-Umshing.
U samla Banpyntngenlang Syiemlieh u la ïathuh ba kine ki bar jylla ki la wan da ki lai tylli ki kali Private kiba don ïa u nombar AS21 M-1397, AS01BA-7400 bad AS02 V-7565 bad ïathuh ruh ba kine ki bar jylla kim don satia wat tang ïa ka Labour License, ka EPIC Card ne kino kino ki kot ban pynshisha hynrei lait noh tang uwei bad arngut kiba la pyni ïa ki Aadhaar Card.
U la ïathuh ruh ba ki nongñiah jong ki kali ki len beit ba kim don jingtip shaei yn leit buh ïa kine ki bar jylla bad kam ruh ba ka dang dei ka sien kaba nyngkong eh ba kin wan rung sha nongbah Shillong.
“Kaba kham pynlyngngoh ïa ngi ka long kine ki bar jylla kim tip shaei kin leit bad kim tip hi ruh mano ba phah bad ngim da sngewthuh sngewthaw ïa ka jingkren ka jong ki,” u la ong.
Nalorkata, u samla Banpyntngenlang u la ïathuh ba wat ki briew kiba donkti ban wanrah ïa kine ki bar jylla sha Meghalaya kim shym la wan mih satia ban ïakynduh ïa ki dkhot jong ka seng wat haba ki la ap haduh jin ar kynta eiei.
Hadien kane, ki Pulit ka Mawlai Police Station ki la wan poi ha kane ka jaka ban pynlong ïa ka jingtohkit kaba bniah.
“Ngi dawa ïa ki Pulit kiba ap pahara ha Infiltration Chech Gate ha Byrnihat ba kin peitngor bad kin pyrkhing ïa ka rung ka mih jong ki briew kiba nabar shapoh ka Jylla Meghalaya,”u la ong.
