Da ka ktien Khasi, Garo bad Jaiñtia yn ïoh kren noh ki MLA ha Ïing Dorbar da jingïarap ki AI : Speaker

Shillong, Rymphang 01 : Ki MLA jong ka Jylla ym slem shuh kin sa ïoh ban kren noh da ka Ktien lajong, kata da ka ktien Khasi, Garo bad Jaiñtia hapoh Ïing Dorbar Thawaiñ ka Jylla, ong u Lamphang ka Ïing Dorbar, Thomas A Sangma haba kren bad ki lad pathai khubor ha ka sngi Palei.
Katkum ka jingïathuh jong u, kane kan urlong naduh ka sien shong dorbar kaban sa long hadien katto katne bnai ym ha kane ka dorbar mang tyngka kaban sdang naduh ka 16tarik Rymphang.
U Lamphang u ïathuh ruh ba ïa kane ka jingpyrshang yn lah ban pynurlong da ka jingïarap ki Artificial Intelligence ha kaba ki stad ha katei ka liang kin sa wan ban peit bniah naduh kane ka sien shong dorbar kaban sa long shen.
“Ngi la pan ka jingïarap na ki Agency bad ki stad kiba lah ban ai jingmut kumo ban pyndonkam ïa ka AI ha ka Dorbar ban sa long. Lyngba ka jingïarap jong ki AI, ki dkhot kin sa lah ban kren da ka ktien lajong, kata ka Ktien Khasi, Jaiñtia bad Garo hapoh Ïing Dorbar,” la ong u Lamphang.
Katkum ka jingong jong u, ki stad ha ka Artificial Intelligency kin sa wan ban peit thuh ha kano ka rukom kin lah ban pynkylla ktien bad ruh ban batai kumno kin leh ban pynurlong ïa katei ka thong.
“Kane lehse kan urlong naduh ka sien shong dorbar kaban wan ym ha kane ka Dorbar kaban sa long ha ka 16tarik mynta u bnai ba ki dkhot ki lah ban kren da ka ktien la jong,” u la ong.
U Lamphang u la pyntip ruh ba na ka liang ka Assembly ki la pyrshang bynta ban pynduna ha ka jingpyndonkam da ki kot ki sla kum ha kaba phah jingtip sha ki dkhot namar bun ki la mynjur bad pdiang ban pdiang ïa ki jingtip lyngba ki lad ka juk mynta kum lyngba ka email bad whatsapp bad kiwei kiwei.