Shillong, Jymmang 15 : Ka jingbym don ka jingker ha ka jingkieng rit kaba don hadien ka ophis jong u DTO East Khasi Hills, Lower Lachumiere ka la pynlong ïa ki kmie ki kpa jong ki khynnah skul ban pynpaw ïa ka jingsyier ban ïaid khamtam ha ka por ba jur u lapbah.
Kitei ki paidbah ha ka kyrwoh ki pynpaw ba lada shu ieh kumto, ka don ka jingma ba ïoh ha kano ma kano ka por ba jur biang ki bor ka mariang kan mih pynban ka jingjia ba sngewsih.
“Nga la ju ïohi ba ha katei ka nala ka um ka heh bha ha ka por slap, te kaei ba nga kwah ai jingmut ïa ki tnat ba dei peit bad ruh ki nongkitkam shnong ba lada long kaba lah ba kin ker noh tang ïa ito i kynja jingkieng bad kynja nar ban khanglad na kino kino ki jingjia ba sngewsih,” ong uwei na ki riew rangbah bym kwah ban pynpaw kyrteng.
Katei ka jingai jingmut jong u ka long eh ban ïada ïa ki khynnah skul haba ki ïaid lynti nangtei ba kin ym hap shapoh.
