Shillong, Jymmang 15: U Dr. Aman War Director of Heatlh and Services (MI) ka sorkar jylla u la ong ba ka jingïada ka long kaba donkam tam ban ïoh ïa ka met kaba koit ba khiah. Ïa kane u Dr Aman War u la ong haba kren kum u kongsan ha ka jingpynlong ka Seng Samla Nongmali-III ïa ka jingai jingsumar bad dawai ei ïa ki paidbah nongshong shnong ha ka sngi Saitjaiñ.
Ka seng samla Nongmali III ka la pynlong ïa kane ka jingsumar bad ai dawai ei ha ryngkat ka jingïatreilang bad ka District Medical of Health Officer ha phyllaw jong ka Community Hall jong ka shnong ha kaba Dr Aman War DHS (MI) u long kum u Kongsan, Bah BR Kharmujai rangbah shnong ka Mawdatbaki kum u symbud kongsan, ka Dr. A. Lyngdoh DM&HO ka EKH, ka Dr. S. Khonglah Addl DM&HO, Bah A Khonglah rangbah dong, ki doktor, staff kiba la wan na Ganesh Das bad Civil Hospital Shillong bad kiwei kiwei.
U Dr. Aman War u la ong ba barobor kidei ki bor pynïaid district jong ka tnad ka koit ka khiah kaba ju pynlong ïa kiba kum kine ki jingai jingsumar, hynrei u la ai ka jingïaroh ïa ka seng samla kaba la shim ïa ka sienjam ban wanrah ïa ka bha ka miat hapoh shnong poh thaw bad khamtam kaba la shim ka sienjam kaban long ka jingmyntoi na bynta ki paidbah nongshong shnong.
U la ong ba ka jingpynlong ïa ki jingsumar kam dei eh tang ban wanrah ïa ki doktor ban ai jingsumar ei hynrei kaba kongsan ka long ban ai ka jingïada ban lait na ki jingpang.
“Ka Health Camp kam dei eh tang ban wanrah ïa ki doktor ban ai jingsumar ei hynrei kumba na ka liang ka tnad ka koit ka khiah mynta ngi la ïapyrkhat bad pynleit jingmut bha ka long ban ai ka jingïada lypa bad kiba kum kine ki jingai jingsumar ka wanrah ka jingpynsngewthuh sha ki paidbah ha kaba ïadei bad ki jait jingpang kiba pher bapher naduh ki khyllung haduh kiba la rangbah,” ong u Dr. Aman War.
U Dr. Aman War u la ban jur ruh halor ka jingdonkam ban pynrung kyrteng ha ka skhim MHIS kaban long ka jingmyntoi na ka bynta ki paidbah khamtam kiba duna ka ïoh ka kot.
“Lada ngi wan ban pynrung kyrteng na bynta ka MHIS ngi jynjar bha ban ïoh namar bun ki paidbah kin hap ban ïeng laiñ bad ki ïakynduh jingeh hadien ba kila leit sha ki hospital. Hynrei da ka jingdon kiba kum kine ki jngai jingsumar mynta ka pynsuk ïa ki paidbah ba kin pynrung kyrteng ïalade,” u la ong.
U Dr. Aman War u la ai khublei ruh ïa ka Seng Samla Nongmali bad ïa ka shnong ba ki la leh ïa kane ka kam kaba bha bad kaba ai jingmyntoi shibun na ka bynta ki paidbah nongshong shnong kaba pynlong ruh ïa ka tnat ka koit ka khiah ban sngewdei ban wanrah lang ïa ka kynhun MHIS khnang ba ki paidbah kin ïoh ban pynrung kyrteng ïalade bad kitbok kitrwiang ba kan nang kiew shaphrang ha ki liang baroh.
Ha kane ka sngi la ïoh ruh ki jingkren na I Dr. A. Lyngdoh DM&HO iba la batai halor ki jait jingpang bad kumno ban kiar na ki jingdih kiba pynsniew ïa ka met kum u duma, sikret bad kiwei kiwei bad ruh na u Bah BR Kharmujai.
Ka Seng Samla ka la pynlong ka jingai jingsumar kum ka jingpang bniat, pang shkor, khmat nalor kiwei kiwei.
