Shillong, Jymmang 14 : U President ka HSPDP u bah K.P Pangniang ul a ïathuh ba u la kyntu hakhmat ka Coordination Committee (CC) jongka sorkar MDA ha ka jingïakynduh ha ka Sngi Palei ban pynsangeh ne buhteng shwa ïa ka Ain Khalai namar kane ka buh ïaka jylla bad ka jaidbynriew haka jinglehraiñ.
Haba ïakren bad u nongthoh khubor u bah Pangniang ula ong “ Hakhmat kane ka CC kaba la ïadon lang da baroh ki Seng Saiñ Pyrthei kiba ïasynrop lang ha kane ka sorkar MDA ba la long shongknor ruh da u Myntri Rangbah u Conrad K Sangma nga la buh ka jingkyrpad ban buhteng shwa ïa kane ka Aiñ Khalai. Hynrei na ka liang u Myntri Rangbah ula pynpaw ba ka jingthmu ka long ban wanrah khajna shuh shuh ïa ka jylla lyngba kane ka Aiñ Khalai. Nga la pynpaw ba ka long ka jinglehraiñ ïa ka jylla bad ka jaidbynriew ban don da ka Aiñ Khalai. Na ka liang ka HSPDP ka la dep pynpaw ïa kaei kaba kam sngew ïahap satia bad ka shong ha u Myntri Rangbah ban shim ïaka rai”.
Namar u la ïathuh ba na ka liang u Myntri Rangbah u ïai ban jur beit hakhmat ka CC ba ka jingthmu ka long beit ban pynmih khajna shuh shuh ïaka jylla da ka jingdon kane ka Aiñ Khalai haka jylla.
