Shillong, Jymmang 15: Ka Jylla Meghalaya kan sa sdang noh shen ïa ka project ban pynkylla ïa ki ñiut ba mih na man la ki thliew Ïing ka Jylla sha ka umphniang da kaba sdang na Tura.
U Myntri Rangbah ka Jylla Conrad Kongkal Sangma un sa plie paidbah ïa kane ka project ha ka 17 tarik Jymmang ha Tura ha ka jingiadonlang u HE Chang Jae-Bok, Ambassador ka South Korea sha India.
Kane ka pilot project bala pyntrei hapdeng ka Sorkar Jylla, ka Tura Municipal Board bad ka Chamhana GK, South Korea la shim rai ha ka jingïalang hapdeng u Myntri Rangbah ka Jylla bad ka Kynhun ki Heh ka Chamhana Institute of Technology, South Korea bala lamkhmat da u Dongmin Choi, Chairman, kaba long myn ha ka 13 tarik Lber 2019 ha Nongbah Shillong.
“U Myntri Rangbah ka Jylla bad ka Kynhun kila mynjur ban pyntreikam ïa kine ki kor ki bor hadien ka jingbatai ba bniah bad la mynjur ruh ban seng ïa ka karkhana rit da ka PPP Mode ha kaba ka Sorkar Jylla kam donkam ban pynlut eiei ruh em” ong ka kyrwoh na ka Sorkar Jylla.
Ka Sorkar Jyla kala iasoi ïa ka soskular ban pynieng ïa ka karkhana ba 35 MT ha ka jaka theh niut ha Tura bad ïa kane ka karkhana yn pynïaid da ka Chamhana GK bad kan ai jinghikai ruh ïa ki trai shnong. Ka sorkar kala ai ïa ka hok ban die ïa ka umphniang sha kane ka kompani ban khyllie ïa ka jinglut jingsep jong ka.
Ïa kane ka project la sdang pyntrei naduh u snem 2020 hynrei kala slem ban pyndep namar ka jingwan lynshop jong ka khlam Covid-19. Ïa ki tiar ki tar bad ki kor jong kane ka karkhana la lah ban wan pynpoi sha India bad sha Tura ha u bnai Rymphang mynta u snem.
U Myntri Rangbah ula ban jur ba kane ka sienjam ka dei kaba la shim ban ïoh peitthuh kumno ka lah ban iarap ha kaban weng ïa ka jingeh na ka jingkynton ki niut hashuwa ban wanrah ïa kum kane ka project ha Shillong bad kiwei kiwei pat ki sor bah.
