Mawkyrwat, Jylliew 17: Ka ophis jong u District Sports Officer (DSO) jong ka South West Khasi Hills District ka la ïoh ban pynhap pyrda noh ïa ka jingïalehkai kynjatbol kaba la tip kum ka South West Khasi Hills District Level Inter-School Subroto Cup Football Tournament 2024 ba la pynlong ha Artificial Turf, MDSA, Nonglang, South West Khasi Hills District.
Ha kane ka lympung la dep ban bynta ïa ki Kynthei kiba hap hapoh 17 snem, Shynrang hapoh 15 snem bad 17 snem ka karta ha kaba kine ki la ïa shikumbynta shitrhem naduh kaba sdang haduh kaba kut.
Ha ka jingïalehkai jong ki khynnah kynthei kiba hapoh 17 snem ïa ka nam jop la rah da ka Jakrem Presbyterian Higher Secondary School pyrshah ïa ka Rangthong Christian Higher Secondary School ha kaba ka la jop lyngba ka Tie Breaker da kaba ka la thep da 3 la 1 kol. Nangta, ha ka jingïalehkai jong ki shynrang hapoh 15 snem ka Little Star Higher Secondary School ka la jop pyrshah ïa ka Rangthong Christian Higher Secondary School da ka Tie Breaker hi da 4 la 2 kol.
Haba phai pat ha ka jingïalehkai jong ki shynrang kiba hapoh ka 17 snem kaba dei hapdeng ka Tenset Secondary School pyrshah ïa ka Mawjarain Presbyterian Secondary School ka la long shisha kaba itynnad naduh ba sdang haduh kaba kut jong ka jingïalehkai ha kaba baroh ar tylli ki kynhun ki la ioh ban thep mar 2 kol kata wat hadien ba la ai por biang ne ka Extra Time ha kaba ki dang ïa khait. Kumta dei tang ha ka Tie Breaker, ka Tenset Secondary School Sakwang ka la ïoh ban thep 3 la 1 kol pyrshah ïa ka ka Mawjaraiñ Presbyterian Secondary School.
Namarkata, ha kane ka South West Khasi Hills District Inter School Subroto Football Tournament 2024 ïa ka nam lahduh na ka bynta ki kynthei kiba hapoh 17 snem la ïoh rah da ka Jakrem Presbyterian Higher Secondary School, na ka bynta ki khynnah shynrang hapoh 15 snem la ïoh rah da ka Little Star Higher Secondary School, Mawkyrwat bad na ka bynta hapoh ki 17 snem la rah da ka Tenset Secondary School, Sakwang bad kine baroh lai tylli ki skul kin sa ïoh ban leit mihkhmat ïa ka distrik ha ka State Level Inter School Subroto Mukherjee Cup 2024 ka ban sa long shem ha Nongbah Shillong ha une u bnai ban sa wan.
Ha ka sngi ban pynkut ne pynhap pyrda ïa ka South West Khasi Hills District Level Inter-School Subroto Football Tournament 2024 la ïadonlang Damang Syngkon, DSO, South West Khasi Hills District, u Samla Chestarpaul Lyngdoh u nongïalehkai ba paw ka jylla, u bah D. Mawlein, DSP, South West Khasi Hills District, bad kiwei de ki riew rangbah kiba la shah khot sngewbha bad la pynshit pynshngaiñ shuh ïa ka lympung lyngba ka jingdon ki nonghikai bad ki khynnah kiba la wan ai mynsiem ïa la ki jong ki khynnah skul.
