Nongstoiñ, Lber 21: Ka kynhun ki Doctor nongsumar bniat hapoh ka shatri kum ka Dental Association Meghalaya State Branch (DAMSB), ha ka sngi palei ki la pynlong ïa ka jingsumar ei ïa ki bniat ki khynnah skul jong ka Edmund Rice Mangkara Secondary School kaba don ha ka shnong Wahrinong, kawei na ki shnong ha ka thaiñ Mawthadraishan Block Eastern West Khasi Hillls District.
La ong ba katei ka jingsumar ei ïa ki bniat ka dei ruh kum shi bynta ban rakhe ïa ka sngi World Oral Health Day, kaba dei ruh ka sngi kyrpang ha kaba baroh kawei ka pyrthei ka ju rakhe ïa kane ka sngi man la u snem.
Ha katei ka sngi ki Doctor nalor ba ki la sumar ei, ki la ai ruh ïa ki jinghikai kumno ban sumar tyngkai ïa ki bniat, khnang ban lait na ki jingbam khñiang bad ban ym duh ei. Namar, ki bniat ki long kiba kongsan ïa u briew bad khlem ki bniat I sniewdur bad I tymmen kloi wat haba dang samla ruh, ong u Dr. Freddie Kharmawlong Pyndap Phang ka kynhun Dental Association Meghalaya State Branch.
Ha katei ka sngi ka kynhun ka la sam ei ruh ïa ki brut shut bniat bad u Colgate bad la ïadonlang ruh ka Dr. Navarie Nongspung, ka Dr. Lari Lyngdoh, ka Dr. Evangeline Dkhar bad u Dr. Mansankara Jyrwa u ba dei u Shongknor ka kynhun Dental Association Meghalaya State Branch.
