Shen yn sa pyntreikam noh ïa ka Urban Parking Policy 2025, pyntip u Myntri Pynroi sor

Shillong, Lber 21: U Symbud Myntri Rangbah ka jylla u ba peit ïa ki kam Pynroi sor u Bah Sniawbhalang Dhar u la pyntip ba shen yn sa pyntreikam noh ïa ka Meghalaya Urban Parking Policy 2025 ban teh kyndon ïa ka jingpynïeng kali ha ki surok hangne ha Sor bad kane kan ïarap ban pynduna ïa ka jingdheng kali ha kane ka nongbah Shillong.
Haba kren sha ki lad pathai khubor, u Bah Sniawbhalang Dhar u la ong, “Ka jingpyntreikam ïa kane ka polisi pynïeng kali kan ïarap ban pynduna ïa ka jingïeng kali ha surok bad yn ym don mano mano ba lah ban shu pynïeng kali kumto ha surok.”
Katkum ka jingong jong u, u Bah Sniawbhalang ua la ong, “Ka jingpynïeng klumar ïa ki kali ha ki surok ka la long kawei na ki daw ba wanrah ïa ka jingkhapngiah kali hapoh sor,” bad bynrap, “Ka tnad kan sa peit ïa ki jaka ban shah pynïeng kali ha surok.”
U Bah Sniawbhalang u la pyntip ruh da kaba ong, “Ha kane ka polisi pynïeng kali yn thaw ïa ka lad ka lynti da kaba shim da ka dor ïa ka bai pynïeng kali bad ki paidbah kin ym lah shuh ban shu ïeng klumar namar yn ai ïa ki zone ha ki surok ha kaba ki paidbah ki lah ban pynïeng kali bad ki jaka kaba kim lah ban ïeng kali.”
Ha kajuh ka por, u Symbud Myntri Rangbah u la pyntip ba ka sorkar ka la rai ban pynkynriah noh ïa ka Secretariat sha ka New Shillong kum shi bynta ban pynduna ïa ka jingkhapngiah ha nongbah.
U la ong, “Kane kan sa ïarap shibun bad kum ka sorkar ngin dang ïakren ban leh ïa ki kam ban pyrshang wanrah bun ki lad ki lynti ban pynduna ïa ka jingdheng kali ha ka nongbah.”