Khring ka NES Petrol Pump da ki nongtrei khasi, ka khusnam man u bnai, ka sait kali ei sha ki nongthep umphniang

Nongpoh, Ïaiong 15: Ka NES Jorabat Petrol Pump, kaba dei kawei na ki petrol pump kaba pawnam bad kaba ïaid ïew bha ha ka ri India, mynta ka sngi ka la pynbna paidbah ïa ki nongjop jong ka lucky draw kaba la pynlong na ka bynta kito kiba ju leit thep umphniang ha katei ka petrol pump kaba don ha 10 Mer, Mawsmai Jorabat.
Kane ka petrol pump ka long kaba kyrpang, namar ka don bun ki nongtrei kynthei Khasi bad ka ai ruh ka jingshakri kaba kham pher, kum ka jingsait kali ei ïa ki paidbah kiba leit thep umphniang. Nalor kata, la ai ruh ïa ki ticket lucky draw ïa kiba thep umphniang palat T.500 ïa ki thuk thuk, T.1000 ïa ki kali rit bad T.5000 ïa ki bos bad ki trok.
Ïa kane ka lucky draw la pynlong man u bnai, ha kaba ki nongjop ki ioh ban rah ïa ki khusnam kiba heh, naduh ka kali ïa uba wan nyngkong, ka thuk thuk ïa uba wan ba ar bad artylli ki ticket shang suwari sha ka ri Thailand ïa uba wan ha ka kyrdan ba lai, nalor kiwei pat ki khusnam.
Haba kren sha ki lad pathai khubor, ka Bashisha Kharkongor bad ka Shimtilang Nongrum, kiba dei ki nongtrei ha katei ka petrol pump, ki la pynpaw ba ïa kane ka lucky draw la ju pynlong man u bnai, bad shisien shisnem ruh la buh da ka kali kum ka khusnam kaba heh tam ïa uba wan nyngkong, katba man u bnai u nongjop ba nyngkong u ioh rah ïaka thuk thuk.
Ki la ong ruh ba nalor ka lucky draw, ki paidbah ki ioh shibun ki jingmyntoi kum ka jingsait kali ei khlem siew pisa bad ka jingshakri kaba bha na ki nongtrei kiba don akor, kiba kynthup ruh bun ki kynthei Khasi.
Ha kajuh ka por, kine ki kynthei Khasi kiba trei hangne ki la pynpaw ba ki sngewtynnad ban trei ha katei ka jaka namar ka jingshngaiñ bad ka rukom pyniaid kaba bha. Ki la bynrap ruh ba kane ka lucky draw kaba ju long man u bnai bad ka jingïalehkai kaba heh shisien shisnem ka long ka lad ban khring ïa ki paidbah ban wan thep umphniang ryngkat ki jingmyntoi kiba ki ioh.
Ha kane ka sngi ïaka khusnam ba nyngkong la rah da u Bah Roland Syiem na Meghalaya u ba rah syndon ïaka kali Alto kaba thymmai.