Ithuh noh ïa ka ktien Khasi kum ka ktien sorkar bad hapoh u Ïaïong dawa pynlong dorbar kyrpang

Nongpoh, Ïaïong 14: Ka Khasi Authors’ Society, ha ka 14 tarik Ïaïong, 2026 ka la pynlong ïa ka jingïalang pynshai paidbah ha Umsning halor ka jingdawa ban ithuh noh ïa ka ktien Khasi kum ka ktien sorkar ha ka jylla Meghalaya.
Ha katei ka jingïalang, la wan ban ai jingpynshai da ki nongïalam ba hakhmat jong ka KAS sengkmie naduh u Prof. D. R. L. Nonglait, President, u Dr. R. P. Kharshiing, General Secretary lem bad kiwei kiwei.
Nalor kitei ki nongïalam ka sengkmie la donlang ruh u Bah Cosmas Rynshon, President ka KAS Shnat Nongpoh, u Bah Esmarjune Kharpan, Secretary, u Bah Rocky Kylla, Chairman ka Umsning Town Dorbar. La wan ruh ban ïashim bynta kum ka jingkyrshan ïa ka jingdawa, da ki sengbhalang bapher bapher, ki nongïalam shnong, ki senglongkmie, ki nonghikai, ki samla pule, ki riewpaidbah bad bun kiwei pat.
Haba kren ha kane ka sngi u Dr DRL Nonglait u la ong ba kane ka jingdawa ban ithuh noh ïaka ktien khasi kum ka ktien sorkar kam dei shuh kaba dang thymmai bad ha kiba bun ki jylla jong ka ri India, la dep ban pyntrei kam ïa ki ktien trai shnong kum ki ktien sorkar ha ka thoh ka tar, ka pule puthi bad ha ki kam sorkar khlem da donkam ban pan jingmut na shabar. Kumta u la ong ba ka jingpynslem jong ka sorkar jylla ha kane ka bynta ka pynlong ïa ka seng ban sngewkhia jur namar kam don kano kano ka jingeh lada ka sorkar jylla ka don ka mon ban pyntrei kam ïa kane ka mat.
Ha kaba ïadei bad ka jingdawa, u la pynpaw ba ka seng ka la buh jingtyrwa ïa ka sorkar ban pynlong da ka jingïatai ba kyrpang hapoh ka Ïingdorbar Thaw Aiñ ka jylla khnang ban pynbeit lane amend ïa ki aiñ ban kyntiew noh ïa ka ktien Khasi sha ka kyrdan “Official Language”.
U Dr. Nonglait u la ban jur ba kane ka jingdawa kam dei tang na ka bynta ka seng hynrei ka dei ka kam kaba ktah ïa ka jinglong jingman jong ka jaitbynriew baroh kawei. U la kyntu ïa ki paidbah, ki sengbhalang bad ki seng saiñ pyrthei ba kin ïa snohkti lang ban pynurlong ïa kane ka jingthmu, namar lada ka ktien Khasi ka ïoh ïa ka jingithuh kum ka ktien sorkar, kan wanrah ka jingmyntoi kaba khraw ha ka pule puthi, ka kam sorkar bad ka jingïada ïa ka riti ka dustur jong ka bri u Hynñewtrep.
Shu ong ba ki Khasi ki stad ba mih ki ophisar IAS bad kiwei kiwei ki ophisar ba kham heh, namar kam long kaba suk ban ïakhun ïaki eksamin haka ktien nongwei, hynrei la jin ba ki samla ka jylla kin ioh ban ïakhun bad pynkhreh ïa ki eksamin haka ktien lajong khlem pep kin sa mih ki ophisar ba heh haka jylla. Kumta u la ong ba ka seng kam lah shuh ban ap da ki phew snem khlem ïohi ïa ki soh.
Ha kaba kut, u la pyntip ba ka seng ka ai por ïa ka sorkar haduh u bnai Ïaïong ban shim ïa ka rai halor kane ka bynta, bad lada ka sorkar ka dang sngap mynthi, ka seng kan sa shim da ki sienjam kiba kham tyngeh ban mih paidbah syndon ym da ka jingthoh hynrei ban leit ïakren markhmat naka bynta ban pynurlong ïa katei ka jingdawa.