Jowai, Ïaïong 14: Ka Jowai bad Amlarem Fire Service & Emergency Service Station mynta ka sngi 14 tarik Ïaïong, 2026 kila rakhe ïa ka ‘Fire Service Day’ hala ki jong ki jong ki ophis treikam jong ki. Ïa kane ka jingrakhe la pynlong hapoh ka phang, “Safe Schools, Safe Hospitals and Fire Safety Aware Society-Together for the Prevention.”
Ha Jowai Fire Service & Emergency Service Station la rakhe hapoh ka jingïalam da u Inspector Gauri Shankar Singh da kaba pynlong ïa ka jingsngap jar ba shipor kum ka dak jong ka jingburom ïa ki jinglen lade jong ki nongpynlip ding ka Fire Service ha kylleng ka Ri kiba la duh noh ïala ka jong ka jingim haka por treikam.
Shi bynta na kane ka prokram la pynlong ruh ka jingpynsngewthuh paidbah shaphang ki rukom jingïada na ka ding. La sam ruh sha ki paidbah ïa ki kot lyngkdop kiba don lang ïa ki jingbthah ba kongsan halor ka rukom pynlip ding.
Ha Amlarem Fire Service Station la rakhe hapoh ka jingïalam da u ophisar bah Tipmon War ha ka jingïadon lang u Sub-Ophisar bah Robert Rymbui bad ki briew jong ka Fire Service. Kiba la pynlong ruh ïa ka jingsngap jar shipor ban ai burom ïa ki nongpynlip ding kiba la khlad noh.
