Yn phah wad bniah ka sorkar ïa ka thymmei jong ki jaidbynriew Khasi, Jaintia bad Garo

Shillong, Iaiong 14 : U Myntri Rangbah ha ka Sngi Ba ar u la pynbna ba ka sorkar ka la mang da ka projek ba kyrpang ban wad ne tih bniah ïa ka thymmei jong ki lai Jaidbynriew Riewlum kata ki Khasi, Jaintia bad Garo.
“ Ngi la thung ar tylli ki Committee ban peit bad wad bniah ïa ka thymmei jong ki jaidbynriew Khasi bad Jaintia bad kawei pat ban wad bniah ïa ka tynrai ne thymmei jong ki Jaidbynriew Garo” Ong u Myntri Rangbah. Ka jingtih bniah kan kynthup ïa ka DNA Mapping, ka jaid ktien ba ïasyriem, ka rukom im bad ka kolshor ryngkat bad ki kot ki sla jong ki ne ki jaidbynriew riewlum.
“ Ngi leh khnang a kane namar ngi kwah ban lap ïa ki jingshisha halor ki nongrim, ki kot ki sla namar katba dang tih bniah katta ki jingshisha kin da paw” ong biang u myntri Rangbah. Kane ka projek kan shim por kumba 18 haduh 24 bnai bad ïa ka kaiphod yn pynmih na ka por sha ka por katba ki nongtih ne nongwad bniah ki dang lap ïa ki jingshisha.
“ Ngin sa pyllait paidbah a kane ka projek wad bniah ha u bnai Jymmang mynta u snem” ong u Conrad.Ka jingsdang ban wad bniah malu mala ka la sdang hi ïa mynta naduh u bnai Rymphang.Kane ka kynhun wad bniah kan ïamir bad wad bniah ruh bad ki tnad pule na ka ri bad na shabar ri ruh khnang ban lap ïa ka thymmei jong kine ki lai jaidbynriew.