Pynthikna ba ki jingïarap ka sorkar ki poi thik sha ki briew ba dei hok ban ïoh: Metbah

Nongstoiñ, Ïaïong 14: Ka Ophis jong u Block Development Officer Mairang C&RD Block, lyngba ka National Rural Livelihood Mission ha ka 14 tarik Ïaiong 2026, ka la ïoh ban pyllait paidbah ïa ki ar tylli ki kali bolero pickup kiba la pynïoh lyngba ka Skhim AGEY jong ka Sorkar India.
Ïa kine ki kali la aiti sha ki ar tylli ki seng trei mon sngewbha, kata ka VO bad CLF na Maroid bad Dongkiingding kaba long kum shi bynta ban kyntiew ïa ka kamai kajih ha ki thaiñ Nongkyndong.
La pynlait paidbah ïa kine ki kali da u Myntri ka sorkar Jylla ba dei khmih ïa ka tnad power and Water Resources, u bah Metbah Lyngdoh ha ka jingïadonlang u Additional Deputy Commissioner, u bah Mayborn Diengdoh, u BDO ka Mairang Block bah A.Lyngdoh, CEO, MSRLS bah S.Lyngdoh bad kiwei ki Ophisar Sorkar ha ryngkat ki dkhot ka Saiñdurlang VO CLF na Maroid bad ka Shalyntem VO na Dongkiingding.
Na ka liang u CEO MSRLS bah S.Lyngdoh u la pynshai ba kine ki kali ki dei kiba la mang da ka sorkar pdeng lyngba ka skhim AGEY bad ban aiti pat sha ki VO bad ki CLF na ka bynta ban pynïaid ïa ki.
U la pynshai ba kane ka dei ka ram kaba khlem sut bad la ai por 6 snem ban pyndep ban siew ïa ka ram. Ka sorkar lyngba kane ka skhim ka shim ïa ka lad ban ïarap ban kynkiew ïa ka ïoh ka kot jong ki skhot SHG, ban pynsuk ïa nongrep ban pynpoi ïa ki mar rep na ki jaka nongkyndong sha ki iew ki hat.
U la kyntu ïa ki VO bad ki CLF kiba ïoh ïa kine ki kali ba kin pynbiang bha ïa ki jingkheiñ jingdiah, kumno ki pynïaid ïa ka kali bad ban pyndonkam hok ïa kane ka skhim khnang ba kan nang plie lad shuh shuh ïa kiwei ruh.
Haba kren kum u Kongsan ha ka jingïalang kaba la long ha C&RD Block Mairang, u bah Metbah Lyngdoh u la ong ba sha Nongkyndong ki dang donkam shibun ki jingïarap, la ka long ha ki surok ne kiwei kiwei ki lad jingïarap kiba lah ban kyntiew ïa ka ïoh ka kot jong ki nongshong shnong.
Kaba hakhmat eh ka long ban pyntikna pat ba ki lad jingïarap ba la ai da ka sorkar, kin poi thik sha ki briew kiba dei hok ban ïoh, khnang ba kata ka jingthmu jong ka jingai jingïarap ne ka jingkyrshan lyngba ki skhim kan don jingmut.
U la ong ruh ba kum u nongmihkhmat u ïohi ba ka jingeh ha ki thaiñ Nongkyndong, ka dei ka lynti syngkien ban pynïoh ïa ka surok kaba bha bad kum u nongmihkhmat ka thaiñ, u la pyrshang ban buddien ha kaba ïadei bad ki surok ha ki shnong khnang ban pynsuk ïa ki paidbah.
Hynrei ban shu don tang u surok, kam pat long kaba biang ban kyntiew ïa ki paid nongrep. Dei halor kane ba ka sorkar India ka shim ïa ki lad ki lynti ban pynïoh ïa kine ki kali lyngba ka skhim GEY, ban pynsuk ïa ki paid nongrep ban pynpoi ïa ki mar rep jong ki sha ki iew ki hat. Kane kan ïarap ban kyntiew ïa ka ïoh ka kot jong ki nongrep ha ki nongkyndong.
U la ong ba ïa kane ka skhim ai jingïarap la aiti sha ki CLF bad ki VO, khnang ba kin pyndonkam ïa ka ha kaba kin lah ban ïarap ïa ki para dkhot ha ka group jong ki bad ruh ban ïa kyrshan lem ïa kiwei pat ki paid nongrep ha ki shnong bad ki thaiñ jong ki.
U la kyntu ïa ki VO bad ki CLF ba ki dei ban pyndonkam hok bad ban bud ïa ki jingbthah kumba la bthah ïa ki ban leh. U la ong ruh ïa ki VO bad ki CLF ba ki dei ban buh ïa ka thong ha ka jingïaid lynti jong ki, khnang ba kan wanrah ïa ka jingmyntoi ïa ki bad ruh kum ka jingplie lynti shuh shuh na ka bynta kiwei kiwei ki skhim ki ban sa wan.
Ha kane ka sngi la ïoh ka jingkaweh lama da u kongsan bad kiwei de kum ka dak ba la pyllait ïa kine ki kali sha ka VO bad ka CLF.