Mana u DC ban bret jaboh pathar ha ki wahduid, nala bad ha shilynter u surok National Highway

Nongpoh, Ïaïong 14: U Deputy Commissioner ka Ri-Bhoi District bad Chairman ka DDMA u la pynmih da ka hukum ban khang pyrshah bad mana ïaki paidbah ban bret pathar ïaki jaboh jabaiñ, haki wah duid, ki wah heh, ki nala bad kumjuh ruh ha shilynter u surok bah National Highway 6 ha Ri-Bhoi District.
Ïa kane ka hukum la pynmih ruh hadien bala iohi ba bun naki nongshong dukan bad ki paidbah, kila bret pathar ïa ki jaboh jabaiñ, ki plastic bad kumjuh ruh ki mrad bala iap ha shi lynter u surok bah National Highway kaba ktah shikatdei ïa ka mei mariang bad wanrah ruh ïaka jingshlei um bad ka jingset jong ki nala tuid um.
Namarkata na ka liang ka bor district, ka la pynmih da ka hukum bad jingmaham kaba tyngeh pyrshah ïa kitei ki briew kiba mlien ban leh ïa katei ka kam ba kim dei ban bret pathar bad dusmon ïaka mei mariang bad la kyrpad ruh ïaki paidbah bad ki nongshong dukan khamtam ba ki dei ban bret haki jaka ba dei bad hakajuh ka por baroh ki nongri jingri khamtam kiba ri masi ba kidei ban leh khuid bad pynthikna ba ka jaboh naka sem jong ki kam dei ban tuid sha ki nala ne ki wah bad halor kane ki ophisar ba dei peit, kynthup ruh ki Rangbah Shnong la bthah ba kin leit ban jurip bad lada lap ïa kino kino kiba pynkheiñ kin ngat haka jingshah pynshitom tyngeh katkum ka Disaster Management Act 2005 ryngkat ka kuna.
Kumta la kyrpad ïa baroh ki paidbah ba kin bud ryntih ïa kane ka hukum bad ban ai ka jingïatreilang bad ka bor district na ka bynta ban pynneh ïa ka khuid ka suba.