Shillong, Jylliew 04: Ka Golflink SC ka la khur jingjop da kaba pynliem 2-1 kol ïa ka Mawlyngngad SC ha ka jingïalehkai jong ka Group C ha ka sngi Palei ha ka lympung U-20 Fourth Division Football League 2026, ba la pynïaid da ka Shillong Sports Association.
Ha ka jingïalehkai, ka Golflink ka la ïoh ban lamkhmat ïa ka kylla step lyngba u Andoni Suting (40’+1 min). Hynrei u Nongialam Kharmalki (59’min) u la pynïakhaid shipor na ka bynta ka Mawlyngngad ha ka kylla miet shuwa ba u Ribanshan Wahlang (65’min) un thep ïa kol pynjop na ka bynta ka Golflink.
Katba ki ar tylli kiwei pat ki jingïalehkai ha ka Group D ki la kut ha ka jingïakhaid. Ka Pynthorbah SC bad ka Nongkseh United SC ki la ïakhaid khlem kol haduh kaba kut, katba ka Mawphlang SC bad ka New Challenger SC ki la thep kol mar ar sien (2-2).
Ka Mawphlang ka la pynkhihjar lyngba u Kerius Rymbai (17’min) bad u Arkidonlang Hujon (49’min) hynrei ka New Challenger ka la pynïakhaid ha baroh ar tylli ki khep lyngba u Bonifast Wanniang (29’min) bad u Pynbianglang Kharsyntiew (68’min).
Kin don lai tylli ki ïalehkai jong ka SSA U-20 Fourth Division Football League 2026 ha kane ka sngi Saitjaiñ. Ha SSA Stadium, ka Mawshbuit pyrshah ïa ka Nongpiur (Group D), ha ka por 1 baje mynsngi, nangta ka Summit FA pyrshah ïa ka Mawnianglah Youth SC ha ka por 4 baje nohphai sngi (Group E). Ha MFA Ground, ka Umiew SCO kan aireng pyrshah ïa ka Sei La Sap SCC (Group E), ha ka por 4 baje nohphai sngi.
