Shillong, Nailar 13: Ka jingïalehkai semi final jong ka SSA U-14 (Boys) Football League 2023 kaba la long hynnin ka Sngi Saitjaiñ ha SSA Stadium, Polo ka la jam sha kaba kut ha kaba ki ar kynhun ba la ïohrung sha ka final ki long ka Umphyrnai SC bad ka PFR Football Accademy.
Haba phai sha ka jingïalehkai semi final kaba nyngkong kaba la sdang ha ka por 2 baje, hapdeng Mawreng SC pyrshah ïa ka Umphyrnai SC, ka jingïakhun ka la long kaba ïakhaid hynrei ka Umphyrnai SC ka la jop salit da shi kol. ïa kane ka shi kol kaba la ïarap ïa ka kynhun ban rung sha ka final la thep da u Bankyrshanbor Kharkongor ha ka 9 minit jong ka kylla step.
Katba ïa ka jingïalehkai kaba ar la pynlong ha ka por 03:45 jan miet, ha kaba ki khynnah lehkai jong ka PFR Football Accademy ki la lah ban pynliem da 2 – 1 kol ïa ka Mawlai SC.
Ha kane ka jingïakhun, dei ka Mawlai kaba la ïoh ban pynkhihjar nyngkong, kata ha ka minit kaba 15 lyngba u Iaisonlang Dohling hynrei ka PFR FA ka la ïoh ban ai jubab lyngba ka kol na u Kevinson Synrem tang hadien ar minit ba ka la shah thep, bad kane ka la pynïakhaid ïa ka jingïalehkai da mar 1 kol.
Dei hashwa ban kut ka por lehkai jong ka kylla kaba ar ba ka PFR FA ka la ïoh ban thep ïa ka kol kaba la pynjop lyngba u Jonwery Marwein ha ka 58 minit.
Lyngba kane ka namjop kine ki ar kynhun, kata ka Umphyrnai bad ka PFR Football Accademy kin sa hap ban ïatyngkhuh ha ka final ban knieh ïa ka burom namlahduh jong ka SSA U-14 Boys Football League 2023, kaba la pynkhreh ban pyndep ha ka 19 tarik mynta u Nailar, 2023, ha SSA Ground, Polo.
