Shillong, Naitung 07: Ki saw tylli ki jingïalehkai ka lympung Shillong Sports Association U-20 Fourth Division 2024 ba la long hynnin ka Sngi Saitjaiñ jong ka taïew ba ladep ha madan MFA bad SSA Ground, la sakhi ïa 3 tylli ki kynhun kiba la khur jingjop, katba kawei ka jingïalehkai ka la kut ha ka jingïakhaid.
Ki kynhun kiba la khur pura ïa ki lai point ha katei ka sngi ki kynthup ïa ka New Challenger SC, ka Madan S&CC bad ka Umiew Maw U Sam SC. Katba ka Pynthorbah SC bad ka Them Rangshken ACC ki la ïakhaid da mar kawei ban ïasam mar shi point.
Ka jingïakhun ha ka por 1:45 baje mynsngi, ha SSA First Ground, ka New Challenger ka la pynliem noh ïa ka Mawlyngngad SC da 1-0 kol lyngba ka namtam na u Lambok Mylliem Umlong ba la thep ha ka khyllipmat shuwa ban kut ka por (70’+3) na ka Group B.
Ha kajuh ka por, ka jingïalehkai kaba la long ha MFA Ground, la sakhi ïa ka Pynthorbah SC bad ka Them Rangshken ACC kiba la khur mar shi point naba ïakhaid da 1-1 kol na ka Group D.
Dei ka Them Rangshken kaba la ïoh lamkhmat ïa ka jingïalehkai lyngba u Stambok Kurbah (11′) hynrei u Rishan Nonghyndah (22′) u la ïoh ban pynïakhaid na bynta ka Pynthorbah.
Hadien kane, ha ka por 4 baje nohphai sngi, ka Madan S&CC ka la pynliem noh ïa ka Mawlynrei SC da 2-0 kol na ka thup ïakhun jong ka Group C ha SSA Ground. U Rodrygo Sympli (37′) u la ïoh ban pynkhih ïa ka kol kaba nyngkong shuwa ba u Anderson Nongkynrih (48′) un pynbud ïa ka kol kaba ar ban pynthikna ïa ka namjop.
Nangta ka jingïalehkai kaba khadduh ha MFA Ground, ka Umiew Maw U Sam ka la seisoh ban khur pura ïa ki lai point ba kongsan hadien ba jop da 2-0 kol ïa ka Mawnianglah Youth SC.
Ka Umiew Maw U Sam ka la ïoh lamkhmat nyngkong na ka kol u Billistar Sun (23′), nangta ka kol kaba bud na u Emmanuel Rongrin (39′) ka la pynthikna syndon ïa ka kynhun ban khur ïa ka jingjop.
Mynta ka Lah Sngi U Blei kin don ar tylli ki jingïalehkai, na ka Group E – Ka Lumkseh SC kan ïakhun pyrshah ïa ka Nongkolew SC, ha SSA Ground, katba na ka Group F – Ka Pommura SC pyrshah ïa ka Lummawbah SC ha MFA Ground, Baroh ar tylli ki jingïalehkai kin long ha ka por 4 baje nohphai sngi.
