Shillong, Naitung 07: Ka kynhun ki nongïakop siat jong ka East Khasi Hills ka la long ka lahduh lane ka ‘Overall Champion’ ha ka lympung ïakop siat kaba 9 jong ka Jylla kaba la tip da ka Meghalaya State Shooting Championship 2024 ba la pynhap pyrda noh ha ka 30 tarik Jylliew, 2024.
Kane ka lympung ïakop siat ba la sdang naduh ka 26 tarik Jylliew, 2024, la pynlong da ka Shooting Association of Meghalaya ha Precision Indoor Range kaba don ha Assam Regimental Centre – Happy Valley, Shillong.
Ha kane ka kynti, baroh ki don 83 ngut ki nongïakop siat – 52 ngut ki dei ki shynrang bad 31 ngut ki kynthei – kiba la wan ïashimbynta na kylleng ka jylla ha kane ka Championship kaba san sngi lynter.
La sam ïa ki takma sha ki 48 tylli ki kyrdan ha kaba ka EKH ka la khur haduh 33 tylli ki takma – 9 tylli ki takma ksiar, 9 tylli ki takma rupa, 15 tylli ki takma rnong – katba ka West Garo Hills ka la wan ba ar da kaba ïoh khur 4 tylli ki takma ksiar, 6 tylli ki takma rupa bad kawei ka takma rnong. Ka Ri-Bhoi ka la wan kyrdan ba lai da kaba khur 2 tylli ksiar bad kawei ka rupa, bad ka West Jaiñtia Hills ka la khur kawei ka takma ksiar.
La sakhi ruh ïa u Lalgouhao Singson, uba dang 11 snem ka rta, u dei u nongsiat uba khynnah tam, katba u Bapynkmen Ajar (53 snem) u dei u ba la rangbah tam. Ki don 5 ngut na ka liang ki kynthei bad 3 ngut ki Shynrang kiba don jingduna ha ka bor ïohsngew bad i wei i nongïakop siat para shooter kiba la wan ïashimbynta ha kane ka Chamnpionship.
La wan sakhi ïa kane ka sngi pynhap pyrda da ki riew pawkhmat na ka tnat pulit, Air Force bad Meghalaya State Olympic Association, ha kaba u Ashish – IPS, SDPO, Sardar u la long kum u Kongsan. Kiwei pat kiba la donlang ha kane ka sngi ki long u Wing Commander – Pande bad u Donald Wahlang, ki dkhot nongkitkam ka MSOA kiba la don bynta ban sam khusnam sha ki nongjop.
