Ka stad jong ka India, kiba dei na ka Indian Institute of Technology, Delhi, ki la sei madan ia ka jingtwa khyndew kaba jur (soil erosion) ha ki lai tylli ki district jong ka Meghalaya bad kitei ki kynthup ia ka East Khasi hills, ka Jaiñtia hills bad ka South Garo hills bad na ka jingkheiñ jongki, la pyni, ba ka jingtuid noh ka khyndew, ka long kaba la jubor sat bad tang ha East Khasi hills, la pyni, ba ka jingtuid ka khyndew, ka long 164.52 ton ha ka shisnem.
Kane ka dei ka mat kaba khia shibun eh, khamtam ïa ki shnong kiba don sha khappud jong ka Bangladesh, namar ba ka khyndew sboh, ka tuid man ka sngi bad ka dei kane kaba la pynkylla dewshrah ïa ka khyndew ba seisoh jong ka thaiñ Riwar hi baroh kawei bad kane ka pynïap lut ïa ka thung ka tep, ka pynduh lut ïa ki tyllong um bad ka don sa kawei ka jingma, ba ka pyntwa ïa ki ïing ki sem, ki surok, ki lynti syngkien, namarba na ka jingshong synjor ka khyndew, ka khynra noh ka um, ha ka por lyiur.
Kam dei tang katta, kane ka thaiñ hi baroh kawei, ka kylla long ka jingma kaba khraw ha ka por lyiur, namar ba ki wah ki la shlei lut bad ki la rong naphang ha ka jingïaid lynti jongki, katba tang shu la wan ka tlang, ka thaiñ hi baroh kawei, ka don ha ka jingtyrkhong um kaba jur bad nangta sa ka jingshit kaba la tasam hi khait, na ka jingtwa noh jong ka khyndew bad ka jingsniew lut ka thung ka tep.
Ka sorkar India lem bad ka sorkar Meghalaya, kim pat pynleit jingmut satia ïa kane ka saw ka sian, kaba jia sha ki shnong khappud; hynrei, ka pynleit jingmut ban knieh noh ïa ki jaka, na ka bynta ban ker sainar, ban thaw surok khappud, hynrei kitei ki jingtei, kim don dor eiei ruh em, ynda haba kin shah rong noh ha ka bor jong ka twa, namar ka jingshong synjor ka khyndew.
Lyngba ka jinglap jong ki stad na Delhi, ka la dei ka por ïa ka sorkar jylla, ba kan ïakren noh mardor bad ka sorkar India, na ka bynta ban shim khia ïa ki jaka kiba don sha khappud bad ka Bangladesh bad ban wad ïa ki lad ki lynti, na ka bynta ban pynneh ïa ka khyndew, lada ka dei, da ki jingthung kiba bat ïa ka khyndew, lane lada dei da ka kynroh ne da ka jinghikai sha ki nongshong khappud, ba kin shim ïa ki jait jingrep, ki ban khanglad ïa ka jingtuid noh ka khyndew sboh.
Ka por ka la dei ruh ban thaw ïa ki nan, ki pung lane ki top um sha ki bri ki bsah sha khappud, ha kaba yn lah ban pynlang ïa katei ka um, na ka bynta ban pyndonkam ha ka sait ka khlieng, lane kaba ai um ïa ki jingthung jingtep bad katei kan ïaid lyngba ka thong jong ka sorkar jylla bad ka sorkar India bad lada kawei pa kawei ka jaka rep, ka don ïa la ka jong ka top um kaba tang shiphew hajar litar, kumta kan jin da la lah ban pynjyrngam ïa ka rep ka riang jong ki, ha ki 5,6 bnai, kiba dei ki bnai ryngkhiang, na katei ka um, kaba yn pynshlei mam, ha ka por lyiur bad lah ruh ban ong ba dei tang da kane ka rukom yn lah ban pynbha ïa ka rep ka riang bad kumjuh ruh ban pynbha briew biang ïa ka mariang kaba dei ka budlum jong ki briew ha ka pyrthei baroh kawei bad khamtam eh ha kane ka jylla.
