Shillong, Jylliew 07: Ka All Meghalaya Karate-Do Association (AMKA) kan pynlong ïa ka lympung karate na ka bynta ki khynnah skul bad khynnah kolej naduh ka 22 haduh ka 24 tarik u Nailar 2024.
Ka lympung ïalehkai Karate kaba 30 jong ka Inter School bad kaba 12 jong ka Inter College Karate Tournament 2023 yn pynlong ha Multipurpose Indoor Hall kaba don ha SAI-Shillong Training Centre-NEHU, ban pynïaid da ka AMKA ryngkat ka jingkyrshan jong ka tnat Sports and Youth Affairs ka Sorkar Jylla.
La khmih lynti ïa ka jingwanïashim bynta daki spah ngut ki nongïalehkai karate na ki skul bad ki kolej ha kane ka rynsan ïakhun kaba lai sngi lynter, kaba ju pynlong man la u snem ban sei madan ïa ki khynnah samla kiba don sap.
Ki nongïalehkai Karate kin ïoh ïa ka kabu ban pyni ïa la ka sap ha ki kyrdan bapher bapher, kum ka kumite (sparring) bad kata (form) ha kaba bun ki nongïalehkai martial art ki la kiew dei lyngba kane ka lympung ban pawkhmat ha ki lympung hapoh ri bad shabar, da kaba khur takma na ka bynta ka Meghalaya.
Kumban shu pynkynmaw, ki lahduh ha u snem 2023 ki long ka St Anthony’s Higher Secondary School ha ka kyrdan jong ki shynrang hapdeng ki skul, ka OM Roy Memorial Higher Secondary School ha ka kyrdan jong ki khynnah kynthei bad ka St Anthony’s College ha ka kyrdan ïalehkai jong ki kolej.
Kino kino kiba kwah ban ïashimbynta mynta u snem ki lah ban pyndonkam da kine ki number phone harum ban twad jingtip ha kaba ïadei bad kane ka lympung: 9774062118, 8837348536, 9856623718, 9378186278, 8794468993.
