SHILLONG, Naitung 09: Ka Pomlakrai SC bad ka Lumparing SC ki la jop ïa la ki jong ki jingïalehkai jong ka lympung Third Division Football league 2026 ba la pynïaid da ka Shillong Sports Association, kiba la long hynne ka sngi Palei.
Ka Pomlakrai SC ka la mad jingjop ha ka jingïakhun Super 8 jong ka Group A da 1-0 kol pyrshah ïa ka Lapalang SC; katba ka Lumparing ka la pynjemkhnap da 6-1 kol ïa ka Iaitylli SC ha ka jingïalehkai Relegation Zone jong ka Group A.
Na ka bynta ka Pomlakrai ïa ka namtam la ïoh ban thep da u Pynkhrehkloi Marbaniang ha ka minit kaba 54.
Katba ha ka jingïakhun ïa ka Relegation Zone ka Lumparing ka la pynkhihjar lyngba u Nathaniel Kharkongor (4 & 8), u Joslang Lyngkhoi (5 & 14), u Riskhem Syiem (33’) bad u Pynbianglang Nongkhlaw (65’).
Ka Iaitylli ka la pynphai ïa ka shi kol ha ki minit pynjlan ba khatduh lyngba u Melawantei Kharlukhi (80+2’).
Ka prokram ïalehkai jong ka SSA 3rd Division Football league 2026 ha kane ka sngi Thohdieng (10.07.2026) kan long ha ka por 1 baje mynsngi hapdeng ka Rynjah SC pyrshah ïa ka Nongumlong SC.
