Shillong, Nailar 18 : Ka lympung ïalehkai OC Blue Shillong Premier League (SPL) 2021-22 ka la sdang biang ha ka sngi Palei (18-08-2022) ha kaba ka Mawlai SC bad ka Nangkiew Irat SC ki la mih madan ban aireng ha ka jingïalehkai kaba la long ha madan Third Ground, Polo, Shillong.
Ha katei ka jingïalehkai, kitei ki ar tylli ki team ki la ïasam mar shi point hadien ba ki la ïakhaid da kaba ïathep mar ar kol. Dei ka Nangkiew Irat kaba la lait na ka nam rem hadien ba ka la ïoh ei shi kol kaba dei ruh ka kol pynïakhaid ba la kum thep bakla da u rangïalehkai ka Mawlai SC.
Kadei ruh ka sien kaba ar mynta ka samoi ba ka Nangkiew Irat ka la lah ban wanphai da kaba thep ar kol ban ïakhaid da 2-2, bad mynta kadei pyrshah ïa ka Mawlai SC ha ka OC Blue Shillong Premier League 2021-22 ha ka jingïalehkai ha ka sngi Palei.
Na bynta ka Mawlai ïa ki ar kol la thep da u Donlad Diengdoh bad u Manbha Iawphniaw katba na bynta ka Nangkiew Irat SC ïa ka shi kol la thep da u Shaibor Nongrum katba ïa ka shi kol la ïoh ei na ka jingbakla thep hi u rangïalehkai dien ka Mawlai. Kadei ka sien kaba ar na bynta ka Nangkiew Irat SC ba kan lah ban pynphai ïa ki ar kol ha kaba dang shen ka la lah ban pynïakhaid da 2-2 ha ka jingïakhun pyrshah ïa ka Ryntih SC.
Haba phai sha ka jingïalehkai hapdeng kine ki ar tylli ki team ïa ka jingïakhun la dei ban pynlong ha ka 4 tarik Nailar hynrei na ka daw ka jingjur slap la pynkynriah noh ha ka 18 tarik Nailar (sngi Palei.
Kine ki ar tylli ki team ki la sdang ban ïakhun nyngkong ha kane ka lympung ha ka 15 tarik Jylliew ha kaba ka Mawlai ka la jop da 2-0. Bad ha ka jingïakhun ha ka sngi Palei, ka Mawlai SC ka la mih madan da kaba khur 22 point bad don ha ka kyrdan ba nyngkong katba ka Nangkiew Irat SC ka kamai 9 point bad don ha ka kyrdan ba hynriew.
Ha ka jingïalehkai, ka Mawlai ka la ñion ha ka kylla step bad ïoh ruh ban thep kol. Hynrei kadei ka sien kaba ar ba ka Mawlai SC kaba don ha ka kyrdan ba haklieh ka khlem khur jingjop.
Ha ka jingïalehkai ba dang ïaid ar minit, ka Nangkiew Irat ka la kham noh mynsiem hadien ba u rangap kol u Bobbyson Nongtdu u la pynur ïa u rangïalehkai ka Mawlai hapoh box hynrei utei u rangap kol u la ïoh ban kyrda noh ïa ka bol ba la shut da u Brolington Warlarpih.
Hadien katto katne minit ba la ïaid biang ka jingïalehkai, ka Mawlai ka la ïoh ban pynurlong hadien ba u Donlad Diengdoh u la thep ïa ka shi kol ha ka minit ba 7 jong ka jingïalehkai.
Ka Mawlai SC ka la sdang ïoh mynsiem bad ïakhun tyngeh ban ñion sha ka kut jong ka Nangkiew Irat ha kaba ka la ïoh biang sa kawei ka penalty. Bad ha ka sien ba ar ka Mawlai ka khlem pynlehnoh ei shuh ha kaba u Manbha Ïawphñiaw uba la wan ban bahkhlieh khlem da pynlehnoh ei u la pynrung beit jlang ïa ka bol shapoh kol.
Katei ka kol la kyntiew sha ka hynñiew kol na bynta u Manbha Ïawphñiaw mynta ka samoi bad ïaryngkat bad u Shano Tariang jong ka Langsning FC.
Haba phai sha ka jingïalehkai jong ka kylla miet, ka Nangkiew Irat ka la kham lah ban ïalehkai bha ha kaba ka la ñion naphang sha ka kut jong ka Mawlai SC. Ki rangïalehkai ka Nangkiew Irat ki la ïakhun tyngeh bad dei ha ka minit ba 57 ka la wan urlong hadien ba u Shaibor Nongrum u la thep ïa ka shi kol.
Lyngba katei ka jingpynphai shi kol, ka Nangkeiw Irat ka la ïai bteng ban ñion sha ka kut jong ka Mawlai bad ïoh pynsmiej katto katne ki jingpyrshang thep kol. Na ka jingdon kum katei ka mynsiem ïakhun bad na ka jingïai pyrshang, ka Nangkiew Irat ka la ïoh ban pynhiar mynsiem hadien ba u rangïalehkai dien ka Mawlai u la kum thep bakla hapoh kol lajong kata ha ka minit ba 85.
Bad haduh kaba kut jong ka jingïalehkai watla baroh ar ki la ïakhun tyngeh ban thep pyntam pynban ka jingïalehkai la poi noh sha kaba kut ha kaba ki la hap ban ïasam mar shi point.
Mynta ka sngi ka jingïalehkai kan long hapdeng ka Mawkhar SC kaba dang ïoh 2 point pyrshah ïa ka Rangdajied United FC kaba kamai 15 point ha ka jingïalehkai ha ka por 4 baje janmiet. Kitei ki ar tylli ki team ha ka jingïakhun ba lah dep ki la ïakhaid da kaba thep mar shi kol.
