Shillong, Rymphang 06 : U Nongïalam ka BJP bad kyrtong ka South Shillong Bah Sanbor Shullai, ula ong ba ka Elekshon MLA-2023 kan dei ka elekshon ba un jop da kaba suk namar ka jingbym don ki kyrtong kiba khlaiñ.
U Bah Sanbor ula pyndep ïa ka jingthep kyrteng hynne ka sngi nyngkong kum u kyrtong bad la synran ïa u da ki Nongïalam bad ki Nongkitkam ka BJP na kylleng ki jaka ka Constituency, kiba la ïaid daka rally shaduh ka Ophis u Deputy Commissioner.
“Ngan jop da kaba suk ha kane ka elekshon 2023 namar kim don ki nongïakhun pyrshah kiba khlaiñ” ula ong haba kynthoh ba ka NPP kam shym la pynïeng kyrtong na South Shillong namar ba kam ïoh satia ïa ki kyrtong kiba biang.
Halor ki jingkynnoh ba u khlem pyntreikam bha ïa ki skhim hapoh ka constituency, u Bah Sanbor ula ong “I Kong Angela Rangad ila shu kynnoh thok. Ila thok bad ki paidbah ka constituency ki la sakhi ba baroh ki la nang jam sahkhmat”.
U Bah Sanbor ula pynpaw ruh ba ki paidbah ka Jylla ki la sdang ban pdiang ïa ka BJP hadien ka jingïohi ïa ki kam ba bha ba la leh da u Myntri Rangbah Duh Narendra Modi bad ruh ba bun ki skhim kiba la pynkha da ka BJP, la pyntreikam ruh hangne ha Jylla Meghalaya.
“Baroh ki skhim la ki dei ki skhim umbam, tan bording, ki surok, ki jaka sumar, ka pule dangle bad kiwei kiwei, ki dei kiba la bei tyngka da ka sorkar Pdeng ba ïalam da ka BJP. Kiwei ki party kum ka NPP bad ka NPP ki im tang ha Meghalaya. Ki paidbah ki dei ban tip ba ka Sorkar Pdeng ka dei kaba ïalam da ka BJP. Ki dei ruh ban tip ba ki skhim ki dei kiba wanrah da ka BJP” ong u Bah Sanbor.
Halor ka jingkam ka Congress ba ki paidbah ka Jylla kin nym shaniah ïa ka BJP namar ka jingthombor pyrshah ïa ki Khristan, u Bah Sanbor ula ong “Ki dei tang ki jingkynnoh. Kam don satia ka jingthombor ïa ki Khristan ha Meghalaya. Ka BJP kum ka party ka long kaba la khreh ban ïalam bad leit sha Delhi banïakhun na ka bynta ka jingbishar hok bad ka jingshngaiñ jong ki Khristan”.
