Sngewsih u MLA ba sah khongreng ki ïing treikam ka Health Deptt. ha Laitlawsang

Mawkyrwat, Jymmang 16: U MLA ka Mawkyrwat Constituency Bah Renikton Lyngdoh Tongkhar ha ka sngi Thohdieng u la leit jurip ïa ki jingtei ba la ieh shrah kiba don ha ka shnong Laitlawsang, South West Khasi Hills.
Ïa u MLA la synran lang da u Block Development Officer jong ka Mawkyrwat C&RD Block Bah I. Lawrynniang, Executive Engineer ka tnat Water Resources u Bah D.P. Muktieh, u DM&HO ka South West Khasi Hills District u Dr. F.R. Lartang bad kiwei kiwei.
Ka jingjurip ka long ïa ki jaka sah jong ka tnat ka Koit ka Khiah kumjuh ruh ïa ka Ware House ne ka jaka buh dawai kaba dang ïaid shakhmat ïa ka jingpyntrei bad la kumba 70 percent la dep ban pyntrei bad ïa ka jingtei ïa ka Ophis treikam jong u Executive Engineer Water Resources.
U Bah Renikton kren ha ki lad pathai khubor, u la ong ba ka long kaba sngewsih ban ïohi ba ki jingtrei ïa ki jaka sah ne ki quarter kiba don ha Laitlawsang hajan ka Mini Secretariat ha kaba naduh u snem 2012 la dep ban bhah ha ki nongpyntrei ba kin pyntreikam hynrei kumba la sakhi haduh mynta kim shym la pyndep ha ka por kaba biang.
“Na ki 5 tylli ki jingtei, kumba ar tylli ki la i don jingkyrmen ba kin pyndep hynrei ïa ki lai tylli kiba dang sah pat ka i duh jingkyrmen lada ki nongpyntrei kin shu pynsah kut ne pynsah teng”, kren diaw mynsiem u Bah Renikton.
U la pynpaw ba kum u MLA ruh u la ju kren ruh na ka por sha ka por sha ki bor ba dei peit bad da kata ha ryngkat ka jingai jingkyrmen jong u SDO ruh ba ïa ki jingtei ba dang sah yn sah lah ban pyndep noh mynta u snem.