Shillong, Jymmang 07: Ki samla pule ka Meghalaya kiba don baroh shi katta ha jylla Manipur, kila pynpaw ka jingsngewnguh kaba khraw ïa ka jingshimkhia jong ka sorkar jylla ban wan shaw noh ïaki na kane ka jylla kaba don hapdeng ka jingïakynad bad jingïaumsnam.
“Nga dap da ka jingsngnewnguh ïa ka sorkar Meghalaya kaba la shimkhia ban wan shaw noh ïa ngi ki samla pule kiba don ha ka jylla Manipur. Ngi la wan sha ka jylla lajong, da ka jingpynlut pynsep jong ka sorkar jylla bad wat haba ngi la poi ha Guwahatai ruh ka sorkar ka la pynbiang ïa ka kali ban poi haduh ha Shillong” ong ka samla M Shylla kaba pule haka jylla Manipur.
“Mynhynnin ka 6 tarik, ngi ïa don 8 ngut kiba wanphai da ka jingpynbiang jongka sorkar Meghalaya, ha kaba ki shipai kila wan ban ai jingïada ïa ngi naduh ka por ba ngi mih na Hostel haduh ban da poi ha Airport” ong ka samla M Shylla.
“Ha ka por ba ka don ka jingiakynad ha ka jylla Manipur ngim shym lei lei, hynrei ngi shu don pat ïa ka jingtieng namar ba ka jingjia ka lah ban sniew ha kano kano ka por bad ka la don ruh ka jingmih jong ki khubor hamsaïa. Ngi shah khang beit hapoh ka Hostel bad ki don kiba pahara habar jong ka Hostel. Ngi don ka jingtieng haba ngi ïohsngew ïa ka jingbthei ki bom bad ka jingmih ka tdem bad ngi la ïohi ruh na jngai ïa ka jingpluh jong kawei ka ïing” la ïathuh ka Samla M Shylla.
Haba ïakren bad u samla Arnestar Warjri uba pule ha RIIMS Manipur ula ong, ha ka por ba mih ka jingïakynad ula don hapdeng ka jingsheptieng hynrei mynta kane ka jingsheptieng kham duna khamtam haba ki samla pule kiba thymmai na Meghalaya kila ïoh ban leit phai sha la ka jong ka jylla.
“Ngi don bha ïa ka jingsheptieng hynrei ngi lah shu long noh kiba jai jai namar ba ngi ki samla pule kiba la heh, ngi hap ban peit ïa ki samla pule kiba hapoh jong ngi. Nga sngewlaitluid khyndiat haba bun ki samla pule kiba hapoh ïa ngi, kila dep ban mih noh naka jylla Manipur bad lashai ka sngi Nyngkong, ngi don kumba 29 ngut ki ban mih noh na ka jylla Manipur namar ha kine ki sngi kiba la dep ngi la phah mih shwa ïa ki samla pule kiba hapoh ia ngi” ong une u Samla.
Ula ïathuh ba ka jingwanphai ka jong ki lashai ka sngi da ka liengsuiñ kadei kaba la pynkhreh da ka sorkar jylla bad ula pynpaw ïa ka jingsngewnguh ïa ka sorkar jylla halor kane bad ka ïathuh ba lashai ka sngi ynda ki mih na ka jaka sah ruh kin wan shaw ki bor shipai ban ai jingïada bad jingshngaiñ ïa ki ban leit sha Airport.
