Hapdeng ka jingïam briew la thang don burom ïa ka met u Bah Roningstar

Laitlyngkot, Jymmang 07: Shisngi hadien ba ki shipai Border Security Force (BSF) ki la siat ïap ïa u Bah Roningstar Nongkynrih kaba la jia ha ka miet sngi Thohdieng ha rum ka shnong Mawshun, ha ka sngi u Blei pat la pyndep noh ïa ka niam ka rukom da u Bah Tipboklang Rynjah, bad la thang don burom ïa ka met jong u hapdeng ka jingïam briew.
Ïa u Bah Roning la thang don burom ha Lum Jynthang ka shnong Jalynteng kaba don ha Tiehlangñiang.
Haba kren ha kane ka sngi na ka liang ka ïing ka sem ka dawa ba ka sorkar ka dei ban ai ka jingbishar kaba hok na bynta kane ka jingshah siat ïap u Bah Roning.
“U leit sha ka kam bylla na bynta ban pyndap ïa ka jingdonkam ki khun bad ka ïing ka sem hynrei mano sha ban khmih lynti ba kum kane ka apot sep sngi kan wan jia ha ka ïing jong ngi, bad namar ngi tip skhem ba kane kam dei ba u ïap na ka daw ka jingpang jingshitom hynrei la shu dkhat jubor na kata ka daw ngi dawa ba kito kiba don kti ki dei ban shah pynsaja kat kum ki kyndon ka aiñ pyrshah ïa kiba pynïap briew,” ong u Kñi jong u Bah Roning u Bah Thlingstar Nongkynrih.
“Ngi khmih lynti ruh ba ki seng bhalang kiba don ryngkat bad ngi naduh ka sngi kaba jia kane ka jingjia haduh mynta ban don ryngkat bad ngi ka ïing na bynta ban pynïoh ïa ka hok jong u pyrsa ba la khlad noh jong ngi,” u la bynrap.
Ha kane ka sngi la ïoh ruh ïa ka jingkren sngewlem na ki nongïalam seng bhalang bapher bapher ha kaba na ka liang jong ki ki la kular ba kin ym shong kli kti tad haduh ba ka hok kan sa paw halor ka jingshah siat ïap u Bah Roning.
“Mano ban lah ngeit ba kita kiba dei ban ïada ïa ki nongshong shnong ka ri kin dei pynban ma ki kiba dkhat ïa ka jingim jong u Bah Roning, bad nga kwah ban kren shai ba ym dei tang ka sien kaba nyngkong ba ki jong ngi ki shah ktah kti hynrei la bunsien bha,” ong u President ka Riwar Mihngi Development Organization u Bah Donlang Nongbri.
“Ïa ki Dkhar Bangla kim ju leh eiei hynrei ki ai jingïada pynban bad ngi tip shai mano ba pynpoi dohkha, mano ba pynpoi jhur ïa ki BSF ha ka ktem jong ki hynrei balei ki ai laitluid ïa ki bar ri katba ïa ki jong ngi pat khlem don satia ka jingpyrkhat ki la shim beit ïa ka jingim jong u,” u la bynrap.
Haba u Mawphor u la ïoh ban ïakren bad u kñi jong u Bah Roningstar, u Bah Tlingstar u la ong ba ka jingshah siat ïap jong u pyrsa jong u ka dei ka kam pyntriem kaba la pynsuhjer lut ïa baroh namar da ki briew ka aiñ ban shu siat ïap khlem jingmap shuh.
“Ngi dei ki nongshong shnong ka ri India hynrei lada kita kiba ka sorkar India ka phah ban ïada ïa ngi ki dei pynban kiba donkti ban siat ïap shano shuh ka jingsngew shngaiñ ïa ngi hato ngin dang nud mo ban leit bylla leit sngi ne ngin heh syrngiew pynban lada ïohi ïa kita kiba kam ba kin ai jingshngaiñ ïa ngi,” u la ong.
“Ngi dei ka jaidbynriew kaba ri bad ngi im ha ka ri ha kaba kiba bun hi ki dei kiba im na ka kam bylla ym eh tang ha shnong lajong hynrei da kane ka jingshah siat ïap u pyrsa jong ngi kam dei ba ka wanrah jingsyier tang ïa ngi hynrei ïa ka jaidbynriew hi baroh kawei,” u la bynrap.