Dawa ka VPP ban tohkit da ka NHRC ne MHRC halor ka jingsiatïap ki BSF ïa u Bah Roning

Shillong, Jymmang 07: Ka Voice of the People Party (VPP) ha ka sngi u Blei ka la pynrem jur ïa ka jingsiat ïap ki briew jong ka Border Security Force (BSF) ïa u Roningstar Nongkynrih kaba la jia ha ka janmiet sngi Thohdieng harum ka shnong Mawshun bad ka dawa ba dei ban tohkit ïa kane ka jingjia da ka National Human Rights Commission neMeghalaya State Human Rights Commission.
Ha ka kyrwoh sha ki lad pathai khubor u Nongaiktien ka VPP u Dr Batskhem Myrboh, u la ong “Ngi dawa ba ki bor Sorkar kim dei ban shim ïa ka jingim briew pyrshah ïa ka aiñ long briew khlem da ïaid katkum ka lynti jong ka aiñ. Ka Party ka
dawa ba ka sorkar ne ki BSF ki dei ban siew sha ki ba ha ïing jong u Roningstar Nongkynrih.”
“Kum ka party ngi kwah ba ki jingshisha baroh kin paw dei ban tohkit ka National Human Rights Commission ne Meghalaya State Human Rights Commission,” la bynrap ka kyrwoh.
Ha kawei pat ka liang, ka UDP Pynursla Circle, ka pynrem jur, halor ka jingpynïap beiñ jong ki BSF ïa u bah Roningstar Nongkynrih bad ka dawa ruh ba dei ban kem mardor ïa kitei ki riew thrang snam, kiba siat im im peit peit ïa u briew, u bym don tiar jingïada eiei ruh em ïalade.
“Ka Circle, ka pynkynmaw ruh ïa u myntri PWD, uba dei U MLA jong ka thaiñ u bah Prestone Tynsong, ïa ka jingpynbna jongu, ban ejahar halor ka jinghap maw ha Riat Rngaiñ, kaba la bam ïa ar ki mynsiem briew. Katei ka jingjia, ka la jan dap artad shibnai bad ki pulit, ki la dei ban kem ïa kiba trei torti ïa ka surok, kiba dei ka daw jong ka jingïap ki arngut ki rangbah,” ong ka kyrwoh na u President ka UDP Pynursla Circle u Bah Aihok Khongmalai.
“Na ka liang ka party ka phah ruh ïa ka kyrwoh sngewlem sha kiba ha ïing hasem une u rangbah uba shah pynuïap beiñ ha ki BSF,” la bynrap ka kyrwoh.