Sa 111 ngut ki samla pule ba dang sahkut ha Manipur, hapoh lai sngi yn leit shaw lut

Poi 41 ngut ki samla pule mynta ka sngi.

0

Shillong, Jymmang 07 : Ki dang don sa kumba 111 ngut ki briew kiba trei bad ruh ki samla pule na ka jylla ki ba dang sahkut mynta ha Manipur hadien ba ka la don ka jingkulmar kaba jur bha ha katei ka jylla.
Na ka liang ka sorkar jylla ka la dep ban pynbeit ba ka jingleit shaw ïa kiba trei bad ruh ïa ki samla pule ka Jylla kiba sahkut ha Manipur kan long man ka sngi bad kane kan ïai bteng lashai ka sngi, 08tarik ter ter haduh 10tarik mynta u bnai.
Ka kyrwoh na ka sorkar ka pyntip ruh ba ha ka 08tarik la pynbeit ba kin leit shaw sa 69ngut ba kynthup ïa ki 21 ngut kiba dei na Shillong bad 48 ngut na Tura. Nangta la pynbeit ruh ba ha ka 09tarik pat kin shaw sa 28 ngut ba kynthup ïa ki 17ngut kiba dei na Shillong bad 11 ngut na Tura katba ha ka 10tarik pat kin shaw ïa ki 14 ngut ba kynthup ïa ki 4 ngut kiba dei na Shillong bad 10 ngut pat kiba dei na Tura.
Katkum ka kyrwoh na ka sorkar la pyntip ba ha kane ka sngi u Blei ki la don 41 ngut kiba la ïoh ban wanphai iing lyngba ki liengsuiñ kyrpang ba la pynbeit da ka sorkar na Manipur sha kadliengsuin Guwahati. Bad nangtei pat la leit shaw da ki kali ban leit buh ïa ki la ka long sha Shillong ne sha Tura.Na kitei ki 41 ngut ba leit shaw hynne ka sngi, 24 ngut kidei na Shillong bad 14 ngut pat kidei na rilum Garo.
Da ka jingia treilang bad ka sorkar Manipur, la ïathuh ba ka sorkar jylla nalor ki ar tylli ki liengsuiñ la pynbiang ruh ïa ki ar tylli kiwei pat kiba kynthup ïa ka Alliance Air bad ka Air India khnang dup lah leit shaw lut ïa ki nongshong shnong ka jylla kiba dang sahkut hangtei.
Nalorkata, la ïathuh ruh ba la pynap ruh hynriew tylli ki kali ha kadliengsuin Guwahati khnang ban leit buh pat ïa ki sha ki jaka ba ki sah.
Ïa kine ki nongshong shnong ka jylla la lah ban leit shaw da ka jingtrei borbah jong ki ophisar ka jylla ba kynthup ïa u Peter Passah, Additional Deputy Commissioner, East Khasi Hills bad u John Danggo, Assistant Inspector, Excise, East Khasi Hills.
Kawei na ki samla pule kaba la poi suk sha la iing ka la ïathuh ba kim shym la tip haduh katno kata ka jingkulmar ka jur, dei tad haduh ban da pyntip da ki nongpynïaid hostel ïa ki, ba kin ym mih shuh shabar na ka jingkulmar ka ba la sdang pur stet sha ki ba bun ki jaka jong ka Manipur.
Ka Ajakshera Momin ka la ong, “Ka jingsgewnguh ïa ka sorkar jylla, na ka bynta ka jingstet ban pynbiang ïa ki liengsuiñ, ki kali ïa ki naduh ka jing wan shaw haduh ka bam ka dih ha lynti syngkien khlem kano kano ka jingthut. Bad ki bor ba dei khmih ki khlem ieh noh shiteng lynti hynrei ki da pyntikna ba ngin poi suk sha iing.”

Leave A Reply

Your email address will not be published.