Shillong Jymmang 7 : Baroh 11 ngut ki MLA jongka UDP ki ïa tylli bad ïalong kawei bad ym don mano mano ruh ba thmu ban phet na ka Party. Kumta ka jingmih khubor kaba ong ba ki don phra ngut ki MLA kiba lah ban kyntiap seng ka long kaba bakla bad ka bym don nongrim, ong u President ka UDP uba dei ruh u Chairman ka State Planning Board u bah Metbah Lyngdoh.
Haba iakren bad u nongthoh khubor u la ong ‘ Baroh 11 ngut ki MLA jongka UDP ki ïa tylli bad ngim don kano kano ka jingthmu ban ïapait ïapra ne ban pynpait pynpra ïa ka party namar ngi dang kwah ban dang pynkhlaiñ shuh shuh ïa ka UDP kaba dei tang ma ka ka seng riewlum kaba heh bad kaba ïeng ha ka nongrim ban shakri ïa ka ri bad ka jaidbynriew naduh ba sdang haduh mynta.Kumba ki paidbah ki la pynjop don burom ïa ka Party ha ka election ba la dep wat lada ym pat poi sha ka thong ruh hynrei ka paw ba ki paidbah ki shaniah ha ka party namar ka jingkiew jong ki nongkyrshan ka long da bun bun shah. Kumta ngi ruh kum ki nongïalam ngin trei ban dang pynkhlaiñ ïa ka party bad khamtam eh ban peit ïa ka khia ka shon jongki jaidbynriew riewlum hapoh ka jylla.
Na ka liang u nongthoh khubor u la pyrshang ruh ban ïoh ïakren ïa ki katto katne ki MLA hynrei namar ba ka dei ka Sngi U Blei ym shym la ïoh ïa ki phone jongki wat haba pyrshang ban phone ruh namar ki don kiba pynlip bad ki don pat kiba ym ïoh satia wat haba pyrshang bun bunsien ruh. Hynrei la sngewthuh shai kdar na u President ba baroh ki MLA ka UDP ki ïalong kawei bad kam don kano kano ka jingthmu ban ïapait ïapra.
