Ngi rung kum ki nongjop ban pynskhem ïa ka sorkar bad tei ïa ka jylla: Banteidor

Ngi pynïasoh namar ngi shaniah ïa u CM bad ki 2 Dy CM

0

Shillong, Jymmang 7 : U MLA jongka Mawkynrew Constituency u bah Banteidor Lyngdoh u la ong ba ma u bad u bah Gavin Mylliem MLA ka Sohra ki rung sha ka NPP kum ki nongjop namar ki kwah ban pynskhem ïa ka sorkar bad ban trei na ka bynta ka roi ka par bad ka jingkiew jongka jylla ha ka liang ka ïoh ka kot bad ban kyntiew ïa ka rep ka riang.
Haba kren ha ka jingïalang ban pynïasoh pura sha ka NPP na ka PDF ha ka Sngi Saitjaiñ ha ophis jongka NPP ha Lachumiere, u bah Banteidor u la ong “ Ngi rung namar ngi shaniah hapoh ka jingïalam u Myntri Rangbah u Conrad K Sangma bad kumjuh ruh ki arngut ki Symbud Myntri Rangbah u bah Prestone Tynsong bad bah Sniawbhalang Dhar bad ngi rung ruh kum ki nongjop ym ban dang hap ban ïaleh election biang. Ka jingrung jong ngi ka long ban pynkhlaiñ shuh shuh ïa ka sorkar ba ïalam da ka NPP bad khamtam eh ban trei na ka bynta ban kyntiew ïa ka jylla ha ki liang baroh. Halor ka jinghiar dor jong u synsar u la ong ba kin shim khia ban bud dien ryngkat bad ka sorkar kumno ba ki nongkhaïi kin ym ïoh lad ban khniot dor than ïa u synsar na ki nongrep namar ïa u synsar la ithuh kum u mar rep mynta. Nalor kane u la ong ruh ban kyntiew ïa ka rep ka riang donkam ban peit ba ka jingsam sboh dawai ruh kan long kaba ryntih bad ïoh bynta da baroh ki nongrep. Nalor kata ha ka soskular ba la ïasoi lang shwa ban pynïasoh la buh lut ïa ki mat kiba ka PDF ka pynpaw ha ka Manifesto jongka ha ka por election bad na ka liang kine ki nongïalam jongka sorkar ki la kular ban pyntreikam lut ïa ki mat bad halor kine ki nongrim la rai ban ïatrei lang noh bad ka NPP khamtam ba ka PDF ka don sa tang arngut ki MLA khnang ban ïoh ïa ka sorkar kaba nang khlaiñ shuh shuh”.
Shuh shuh u la ong “Ka People’s Democratic Front (PDF) ka la buh haduh 11 tylli ki kyndon ha ka jingleit rung pura sha ka National People’s Party (NPP) ba kynthup ïa ka jingdawa pyntreikam ïa ka Roster System nangne shakhmat (Prospectively) bad ka jingwanrah ïa ka Inner Line Permit (ILP).
Kine ki 11 tylli ki kyndon ki dei kiba la pruid dak ha ka soskular ban pynïasoh pura sha ka NPP bala ïasoi hapdeng u President ka PDF Bah Gavin M Mylliem bad u National President ka NPP u Conrad K Sangma mynta ka sngi saitjaiñ ha ka jingïalang ba la pynlong hapoh ka Ophis headquarter ka NPP ha Shillong.
Kiwei pat ki kyndon kiba la buh ha kane ka soskular ki kynthup ïa ka jingpynbeit noh ïa ka jingïakajia pud bad ka Assam, ka jingpynrung ïa ka Ktien Khasi ha ka khyrnit ba phra, ka jingthaw ïa ka Agriculture Policy, ka jingpyntreikam ïa ka Employment Generation Policy, ka Transparent & Effective Recruitment Policy, ban shong bishar biang ïa ka
Meghalaya Minor Minerals Concession Rules 2016, ban pynkhlaiñ ïa ka jingpynmih bording hapoh u 2028, pynjanai ïa ka lad pynïasoh na suiñ sha Shillong bad tehlakam ïa ka jingjyllei u droks hapoh ka Jylla.
Halor kane, u Myntri Rangbah ka Jylla ula kular ïa ka PDF ban ïatreilang ha ka ban lah pynyrlong ïa baroh ki kyndon bapher bapher ba la pruid dak ha ka soskular bad ong “Ngi don ïa kajuh ka jingmut bad ai ba ngan kular ïa phi ba ngin sa ïatreilang ban pynthikna ban gin lah pynurlong ïa baroh kine ki mat bala kdew ha ka soskular. Nga lah ban kular ïa phi ba khlem pep ngin sa leh eiei ïa kine ki kam”.

Leave A Reply

Your email address will not be published.