Hadien ka 13 tarik : Lah ban pynsmai myntri ïa uwei napdeng ki 2 ngut ki MLA ba rung sha ka NPP

Shillong, Jymmang 7 : Kat kum ka khubor ba la ïoh la ïathuh shwa ba ki arngut ki MLA ka PDF kin wan ban pynïasoh ne rung pura sha ka NPP ka la don ka jingïakut ba kawei ka shuki myntri kan leit sha ki hadien ka election MLA ha Sohiong. Kumta la ïoh jingtip ba hadien ka 13 tarik kan sa don biang ka jingpynsmai myntri ha kane ka sorkar MDA ba la ïalam da u Myntri Rangbah u Conrad K Sangma.
Ym lah ban tip na ei u myntri rangbah un khlong ïakane ka shuki la un pynhiar shuki ïa ki myntri na ka NPP ne u lah ban knieh noh na ki seng riewlum kata la ka dei na ka UDP ne na ka HSPDP ruh.
Haba ïakren bad ki katto katne ki MLA ha ka sorkar MDA ki la ïathuh ba ki bna ïa kane ka khubor tangba kim tip nangno u myntri rangbah un shim ïa ka bhah shuki ban ai sha ki MLA ka PDF kiba la wan ban pynïasoh pura sha ka NPP. Namar ki tip shai ba kane ka dei ka bai nong kaba un ai ïa kawei ka shuki myntri sha kine ki MLA ka PDF kata la ka dei sha u bah Banteidor Lyngdoh MLA ka Mawkynrew ne sha u MLA ka Sohra u bah Gavin Mylliem.
Uwei na ki MLA jongka sorkar u la kren thikna ba kan sa don beit ka jingpynsmai myntri hadien ka election MLA jongka Sohiong kata hadien ka 13 tarik mynta u bnai “ Ngi shaniah ha ka jingstad jongu Myntri Rangbah ka jylla namar kane ka dei ka kam kaba lah ban shim rai tang da u marwei hi”.