Sngewlem ka Kur Dhar halor ka jingshah pyniap u Chiang Dhar bad kyntu ïa ki bor ka aiñ ban kem îa kiba donkti

Khliehriat Kyllalyngkot 10: Ka Seng Kur Dhar, Narpuh Unit kala pynpaw ka jingsngewsih halor ka jingjia shah pyniap dusmon jong u wei na ki dkhot jong ka Kur uba kyrteng u Sylvanus Dhar, 48 snem ei ei bad ïa uba la ju khot ieit u ruh kum u Chiang Dhar, uba na ka shnong Umkiang kaba la jia hynnin ka sngi, 6 tarik mynta u bnai.
Ka Kur ka phah îa ka khubor sngewlem sha kiba ha ïing ha sem bad ki khun ki kti jong une u samla rangbah jong ka kur uba la duh ei îa ka jingim ha ka kti ki runar kiba la suba ba ki dei ki ‘Khar Bangladesh kiba dei ki nongtuh nonglute îa ki bri kwai bri tympew jong ki Khasi Pnar bad kiwei de ki kam be-aiñ jong ki.
Ka Kur Dhar ka buh ka jingduwai ha khmat u Blei Trai Kynrad ban ai ka jingpyntngen bad jingkyrshan bor ïa baroh kiba ha ïing ha sem bad kiba don jingiadei baroh bad u Chiang Dhar, ka kur Ka buh ruh ka jingduwai ba ka Mynsiem ba kordor jong u Chiang Dhar kan ioh ban shongsuk ha dwar U BLei.
Ha kajuh ka por ka Kur Dhar ka buh ka jingkyntu kaba jur ïa ki bor jong ka aiñ naduh ki bor Pulit haduh ki bor Sorkar Jylla ba kin shim khia halor kane ka jingjia da kaba kin kem shisyndon ïa kiba donkti ha kaba pyniap dusmon ïa u ne u khun jong ka Kur Dhar bad ban pynshitom ïa ki katkum ki kyndon jong ka aiñ.
Ka Kur Dhar Narpuh ka ai khublei kyrpang ruh ïa ki bor shnong Umkiang bad ki Pulit Umkiang kiba la shim khiah ban leit shimti ïa ka met jong u Chiang Dhar na ka jaka ba jia kane ka jingshah pyniap ha kaba la pynkit ruh ïa ka met jong u sha Khliehriat Civil Hospital ban pyndep katkum ki kyndon jong ka aiñ.
La pyntip ruh ba ïa ka met ba dangsah jong u Chiang Dhar yn sa tep donburom lashai ka sngi ha u Lum jingtep ka Balang Katholic Umkiang, ha ka por 11:30 AM ong ka khubor lyngba u President seng kur Dhar, u ma G. Dhar bad Secretary ma J. Dhar.