Nongpoh, Naiwieng 29: Ka Petroleum Dealers Association of Meghalaya (PDAM) bad ka Meghalaya Indane Distributors Association (MIDA), ki la pynpaw ïa ka jingkmen halor ka jingshim khia jong ki bor sorkar halor ka rai jong ka North East Petroleum Mazdoor Union (NEPMU) ban ym pynpoi umphniang (petrol/diesel) shapoh Meghalaya tang hadien ki katto katne ki jingjia ba la jia ha ki khyndiat sngi.
Lah ban kdew, ba dang ha ka 24 tarik ki bor pulit ka Meghalaya ki la pynlong ïa ka jingkhynra naphang ïa ki jaka pynlang umphniang beaiñ kiba don ha surok bah NH-6 ha Ri Bhoi District bad kem ruh ïa ki briew ba donkti.
Namar kane, ka NEPMU ka la phah ïa ka shithi sha ka Sorkar Jylla bad pyntip ïa ka rai ban sangeh pynpoi umphniang naduh ka 29 tarik Naiwieng haba ïathuh ruh ba wat ka Mazdoor Union kala pynpaw ba ki nongñiah kali kit umphniang kila sheptieng ban wan sha Meghalaya namar ka jingshah thombor ha ki Pulit.
Haba kren bad ki Nongthoh Khubor, u Bah Kennedy Khyriem, President ka PDAM bad u Bah BL Blah, President ka MIDA, ki la ai khublei kyrpang ïa ki bor ka sorkar Meghalaya kiba la lah ban pynlong ïa ka jingïakynduh kaba seisoh hapdeng ki dkhot jong ka Mazdoor Union ha ryngkat ki kompani IOCL, BPCL, bad ki trai petrol pump jong ka jylla Meghalaya ha kaba lah ban shim ïa ka rai ban weng noh ïa kane ka jingthmu sangeh pynpoi umphniang shapoh ka jylla Meghalaya.
Ki la ïathuh ruh, ba ha kane ka jingïalang ba la long ha Nongpoh, ka la don ka jingïatai kaba seisoh ban pynurlong ïa shibun ki jingdonkam jong ki nongñiah bad ki nongbud ïa ki kali kit umphniang ba ki dei hok ban ïoh nalor kiwei kiwei ki jingïakren kiba lah ban pynhun ruh ïa kiba bun tylli ki mat.
Ha kaba ïadei bad ka jingkhynra naphang ki pulit ka Meghalaya ïa ki jaka pynlang Umphniang ha Ri Bhoi District, kine ki nongïalam ki la pynpaw shisha ïa ka jingsngewkhia kaba jur halor ka jingdon jong ki kynhun nongtuh umphniang hapoh ka jylla kaba la wanrah shikatdei ïa ka jingduhnong ïa ki trai petrol pump kiba ju thied da ka hok ïa ka umphniang na ki kompani.
“Ka long kaba beaiñ shisha ïa kito kiba donkti ban shu tuh ïa ka umphniang kaba la thied hok da ki trai petrol pump ha ryngkat ka jingbud beit ïa ka jingpynïaid ka sorkar namar ka umphniang ka dei kaba don jingma haduh katta katta namar ka lah ban bthei ha kano kano ka por”, ong ki nongïalam da kaba bynrap ruh, ba halor kane ai ka aiñ hi kan bishar bniah namar ka jingtohkit ka la sdang hadien ka jingkhynra da ki pulit kaba la dep dang ha ki khyndiat sngi.
