Ka jingbuh petrol laki laka kala dei lypa kaba beaiñ namar ka umphñiang petrol ka dei kaba kem ding: President PDAM

Nongpoh, Naiwieng 29: U Bah Kenedy C Khyriem President ka Petroleum Dealers Association of Meghalaya (PDAM) u la ong ba kum ki trai Petrol Pump ki dap da ka jingsngewkhia ban tip ba ka umphñiang kaba kila dep ban thied ka jah shiteng lynti namar ka jingdon jong ki kynhun kiba tuh bad khaïi beaiñ ïaka umphñiang, bad kum ki trai Petrol Pump hi kim pyrshah ïaka NEPMU ne ki nongñiah ne ïano ïano hynrei ka jingpyrshah jong ki ka long ïakiba tuh bad ai ba ka aiñ kan leh ïa kaba donkam bad ban pynshitom ïaki.
U la ong ruh ba ka jingbuh petrol laki laka kat shaba lap ba shem kala dei lypa kaba beaiñ namar ka aiñ kam shah ban leh kumta kumba ka umphñiang petrol ka dei kaba kem ding bad don jingma bad kumba haka jingkhynra ki pulit haki 7 tylli ki jaka la lap ruh ba ka don kum kata ka jingbuh ïaki umphñiang ban khaïi beaiñ ryngkat ki tiar ruh ban pyndonkam ha kaba tuh umphñiang, ka aiñ ka dei ban pynshitom ïaki bad ban pynngat haki kyndon aiñ.
U la ong ruh hadien ka jingkhynra jong ki pulit ka jylla ïaki jaka suba khaïi umphñiang tuh, naka liang ka Mazdoor Union kala mih shakhmat ruh ban ujor sha ka sorkar halor ka jingkynnoh ba kala don ruh ka jingjrong kti wat ïaki nongñiah kiba lui lui bad kiba dang ïeng bamja haki dukan bamja bad pynngat ruh ïaki haki kyndon aiñ bad lada ka dei shisha kumta naka liang ki trai petrol pump kim kyrshan hynrei ki pynrem ïa katei ka jingleh jong ki pulit bad ai ba kita ruh kin ngat haka aiñ namar ym don ba kham halor ban ïaka aiñ.
Katto katne naka liang ka NEPMU kala pynsngew ruh ba ki kwah ban ïapynbeit hapdeng ki trai bad ki company kum ka tulop ïaki nongtrei, ka Isnurance namar ban ñiah kali kit umphñiang ka long kaba ma bad kum ki trai petrol pump hi kin ai ka jingïatreilang bad ka Union.
U la ong ruh ba naka liang ka Association ka phah ruh ka khubor ba shai sha ki paidbah kumba kala don ka jingkynthoh haki rynsan Social Media halor ka jingbyrngem sangeh pynpoi umphñiang sha ka jylla kum ki paidbah ki dei ban wad shuwa ïaka jingshisha, namar ka jinglehraiñ ka wan ïaki hi, kumba la sakhi ruh ba ki paidbah khlem da tip ïaka jingshisha kila leit ban ïeng laiñ bad ban thngian haki petrol pump ban ioh thep umphñiang hynrei kum u President ki trai Petrol Pump u la kren shai ba kam don ka jingduna umphñiang namar ka Petrol, Diesel, Gas ki dei shibynta ka jingdonkam jong u briew (Essential Commodities) bad naka liang ka sorkar ka shimkhia ba dei ban pynpoi beit ïaki wat lada donkam ban synran da ki pulit, u la bynrap.