Batai bakla ka Social Welfare ïa ka Lineage Act, dawa ka HYC ban pyndam ïa ka shithi

Shillong, Naiwieng, 29: Ka Hynñiewtrep Youth Council (HYC) ha ka sngi Balang ka dawa ïa ka Sorkar Jylla ba kan pyndam noh mardor ïa ka shithi ba la pynmih da u ophisar jong ka tnat Social Welfare kaba batai bakla ïa ka KHAD (Khasi Social Custom of Lineage) Act, 1997.
Ha ka jingïakren bad ki lad pathai khubor hadien ka jingïalang bad u Myntri ka tnat Social Welfare u Bah Paul Lyngdoh, u President jong ka HYC u Bah Roy Kupar Synrem u la ong, “ngi la kyrpad ïa u Myntri ba un pynmih da ka jingbthah ban phah pyndam mardor ïa ka shithi.”
U la ong ba ka shithi jong ka tnat Social Welfare ka ong, “shuh shuh, lah ban kdew ba ka Lineage Act, 1997 kam khang satia ban ai ïa ka syrnot ST sha u ne ka nongaplai da kaba shim bujli ïa ka jait la ka long na u kpa ne na ka kmie bad la shah ruh ban pdiang ïa ka jait jong u tnga da ka kynthei ka bym dei ka Khasi.”
“(Ka HYC) ka ladep thoh sha ka Khasi Hills Autonomous District Council (KHADC), Shillong, ban pan jingpynshai la ka aiñ kaba la shna da ka KHADC kaba la tip kum ka KHAD (Khasi Social Custom of Lineage) Act, 1997 ka shah neem ban ai syrnot Schedule Tribe. Halor ka jingujor jong ngi, ka Registration Authority, jong ka KHADC, lyngba ka Shithi DC.II/RA/24/2023/2 dated Shillong, the 8th May, 2023 ka la phah sha u Under Secretary ka tnat Social Welfare ka jong ka Sorkar Meghalaya, ban ai ïa ka jingpynshai bad kyntu ruh ïa ki bor ba dei peit ban ym ai syrnot ST kaba long kum ka jingpynkheiñ ïa ka KHAD (Khasi Social Custom of Lineage) Act, 1997 bad ka Rules ba ladep shna,” ong u Bah Synrem.
“Kane ka shithi kaba wan na u Under Secretary jong ka tnat Social Welfare, ka Sorkar Meghalaya ka long kaba be-aiñ bad kaba long pyrshah ïa ka riti ka dustur bad kaba ïatakhuh bad ki aiñ jong ka KHAD (Khasi Social Custom of Lineage) Act, 1997 bad ka Rules ba ladep shna. Namarkata, dei ban pyndam noh mardor ïa kane ka shithi,” u la bynrap.