Shillong, Naiwieng, 29: Ka All Khasi Meghalaya Tourist Taxi Association (AKMTA) ha ka sngi Balang ka la ïakynduh ïa u Myntri ka tnat Jngohkai Pyrthei u Bah Paul Lyngdoh da kaba kyntu ban pyntreika ïa ka polisi kaba pyrkhing ïa ki kali Tourist kiba wan nabar ka jylla ban leit rung sha ki jaka jngohkai pyrthei kiba don ha ka jylla.
Ha ka jingïakren bad ki lad pathai khubor, u President ka AKMTA u Bah Ricaldinus Dohling u la kam ba khlem ka jingpyrkhing, ki kali Tourist kiba wan nabar ka jylla khamtam na ka jylla Assam ki la knieh noh ïa ka pliangja jng ki nongniah kali trai jylla kiba ju kamai ban leit buh ïa ki nongjngohkai sha ki jaka jngohkai pyrthei khamtam sha Sohra bad sha Dawki.
U Bah Dohling ula ong ba ka jingïalang bad u Myntri, ka Seng ka la ai jingmut ïa ka Sorkar Jylla ban ithuh ïa ki jaka kum ka ISBT kum ka jaka ban pynsangeh ïa ki kali Tourist kiba wan nabar ka jyllla bad na kine ki jaka, ki kali tourist jong ki trai jylla kin dup lah ban kit ïa ki nongleit shangkai sha ki jaka jngohkai pyrthei kiba don ha ka jylla.
“Ngim pyrshah ïa ki kali kiba wan na ka jylla Assam lane na kino kino ki bynta jong ka ri hynrei ngi sngewkhia ba kine ki kali kiba Tourist nabar ka jylla kiba leit sha ki jaka jngohkai pyrthei ki long kum ka jingkhanglad ïa ki kali tourist trai jylla ban kamai jakpoh,” ong u Bah Dohling.
U la kam ba khlem ka jingpyrkhing, la sakhi ba ha ki sngi kut taiew, da ki phew tylli ki Bos na Assam kiba kit ïa ki nongjngohkai sha Sohra bad Dawki kaba long kum ka jingknieh noh ïa ka kamai jakpoh jong ki trai jylla bad kaba wanrah ruh ïa ka jingdheng kali kaba jur ha ka thain Upper Shillong.
U la bynrap ba ka Seng ka la kyrpad ruh ïa u Myntri ba un pynjynsur ïa ka por ban pynieng kali na ka bynta ki Tourist Taxi ha ka por mynstep kiba dang ap ïa ki nongleit jingleit na ka thaiñ Khyndai Lad.
