Shillong, Naiwieng 29 : Ka Dorbar Shnong Moolamylliang, ka shnong kaba la pawnam kylleng na bynta ka jingleh khuid bad ka jinglah ban pynitynnad da ki rong bapher bapher ha ka taiew Christmad bad Snem Thymmai ka la shah jied ban pdiang ïa ka khusnam ‘13th International Conference on Sustainable Waste Management & Circular Economy and IPLA Global Forum 2023’, kaba la long ha sorbah Mumbai ha ka 29 tarik mynta u Naiwieng 2023.
Ïa kane ka khusnam la aiti sha u Rangbah Shnong ka Moolamylliang da u Consul General jong ka Kingdom of Netherland u Bart De Jong bad u President jong jong ka ISWMAW u Sadhan Ghosh ryngkat kiwei de ki kynrem ki lyndan. Na kane ka jylla Meghalaya la sakhi lang ïa kane ka jingïoh khusnam kane ka shnong da u Environmental Engineer jong ka Meghalaya State Pollution Control Board u Bah S Syiem ryngkat u Principal jong ka Synod College Shillong u Dr. RM Lyngdoh.
Ka shnong Moolamylliang ka dei ka shnong kaba don ha Ri Lum Jaintia kaba la bun snem mynta ka dei ka shnong kaba la paw bha ha kane ka jylla bad ha ki katto katne ki bynta jong kane ka Ri India, na ka jingkhuid jongka bad khamtam ha ka aiom Christmas. Dei ha kum kane ka por ba ka khring bha ïa ki paidbah na kylleng ka jylla ban leit jngoh ïa kane ka shnong khamtam ynda la dum ka suiñ bneng, namar naduh ki khyndiat snem mynshuwa, tang ha kane ka shnong lah ban sakhi ïa ka jingrakhe ïa Christmas ka long baroh shi aiom, da kaba pyndait ïa ki jingthaba kiba laiphew jait da ka bording ha baroh kawei ka shnong.
Hapoh ka jingïalam jong u Rangbah Shnong u Bah Apmon Pachang bad kiwei de ki nongkit kam shnnong, la ju thung dieng bun tynrai ruh ha kylleng ki kyndong kynshrot jong kane ka shnong bad rakhe ïa ka Christmas haka rukom kaba pher na kiwei pat lyngba ka jingtrei ryngkat ryngkat bad ki nongshong shnong.
