Ngam sngew eiei bym ïoh tiket, ngan trei shitom ban pynjop ïa ka Kong Ampareen: H.M Shangpliang

Shillong, Naiwieng 29: U bah H.M Shangpliang MLA ba rim ka Mawsynram u la pynpaw ba um don kano kano ka jingsngewdiaw ne sngewsih wat lada u khlem ïoh ïa ka ticket ban ïakhun ha ka Election MP Lok Sabha 2024 na ka National People’s Party (NPP) hynrei u la rai ban trei shitom ban pynthikna ba ka kyrtong jong ka Party ka kong Ampareen Lyngdoh kan ïoh ka jingjop ba donburom..
Ula bynrap ba u dap da ka jingkmen ba ka Party ka la jied daka Myntri Sorkar ka Kong Ampareen Lyngdoh ban ïakhun haka ilekshon MP 2024 na Shillong Parliamentary Seat.
“Hoid nga ruh nga dei uwei na kiba kwah ban ïakhun haka election MP 2024 na ka NPP hynrei haba don bun ki nong pan ticket, ka pynpaw ïa ka jingroi jong ka Party, ka ticket ka don tang kawei, namar kata ka jingjied ruh ka long tang kawei. Nga sngew ba ka jingjied ïa ka Kong Ampareen, ka Party ka la leh bha bad kan long ka kyrtong ka ban poi sha ka jingjop bad ma ngi bad ma nga ruh shimet ngan trei borbah ban pynthikna ba ka kyrtong jong ka NPP kan poi shaka jingjop” ong u bah H.M Shangpliang.
Haba kylli hato ka Party ka la tyrwa ne em ïa ka ticket hashuwa ba un pynïasoh shaka NPP, u Bah H.M Shangpliang ula ong “Kam don ka jingshisha ba ong ba ka la don ka jingpynbeit ban ai Ticket ïa nga hynrei ha ka 13 tarik Nailur haka jingpynïasoh shaka NPP nga la kren ha baroh da kaba ong ba nga pynïasoh shaka NPP khlem da buh kyndon”.
U Bah Shangpliang ula ong ba un ïai trei ban shakri ïa ki ba duk bad ïa ki nongrep kumba u ju shakri haka por ba u dang long MLA bad un nang ïai rah ïa ki jingeh jong ki nongrep sha ka Sorkar na ka bynta ka bha ka miat ki ba duk bad ki nongrep jong ka Jylla.
Haba kylli hato yn ïakhun ne em ïa ka election MDC, u Bah Shangpliang ula ong “Ngam ïakhun ha ka election MDC hynrei ngan ïai trei ban pynthikna ba ka NPP kan ïoh jingjop haka election MDC”.