Shillong, Naiwieng, 29: Ka Hynñiewtrep Youth Council (HYC) ha ka sngi Balang ka la kyrpad ïa u Myntri ka tnat Social Welfare ka Sorkar Jylla ba un tuklar lem khnang ban pynthikna ba ki ophis treikam ka Sorkar Pdeng ki dei ban pyntreikam ïa ka jingbhah kam kaba 44% ïa ki Scheduled Tribes jong ka jylla.
Ka HYC ka la dawa ruh ban thaw noh ïa ka Fast Track Courts khnang ban pynstet ïa ka jingpynkut ïa ki NDPS Cases bad ban pyntreikam ïa ka Prevention of Illicit Traffic in Narcotic Drugs and Psychotropic Substances Act, 1988 (PIT-NDPS Act).
Ha ka shithi ba la aiti ha u Bah Paul Lyngdoh, u President ka HYC u Bah Roy Kupar Synrem u la ong, “namarkata, ngi kyntu ïa ka Sorkar Meghalaya ba kan shim ïa ki lad ki lynti ban pynthikna ba ki ophis treikam ka Sorkar Pdeng/Institutions/Undertakings, bad kiwei kiwei kiba don ha ka Jylla Meghalaya ba ki dei ban bud bad ban pyntreikam ai ka Office Memorandums bad ïa kiwei kiwei ki jingbthah ba la pynmih da ka Sorkar India lyngba ka Ministry of Personnel, Public Grievances and Pensions Department of Personnel and Training New Delhi, khnang ba ki samla riewlum kin ïoh lem ïa kane ka jingmyntoi.”
U la ong ba katkum ka Office Memorandum No.360 1711 12004-Estt.(Res.) ba la pynmih da ka Sorkar India lyngba ka Ministry of Personnel, Public Grievances and Pensions, Department of Personnel and Training New Delhi, ha ka 5 tarik, Naitung, 2005; ka Office Memorandum kaba la pynmih ha ka 4 tarik, Naitung, 2007 bad ka Compendium of Intructions No. F.No.36011/1/2022-Estt.(Res-I) kaba 14 tarik, Risaw, 2022, ka Sorkar India la pynthymmai ïa ka bhah ban mang kyrpang ïa ki Scheduled Castes, Scheduled Tribes bad Other Backward Classes lada jia ba ka don ka jingthung kam ha ki post Group ‘C’ bad “’D’ khnang ban pynrungkam ïa ki samla na kane ka thaiñ.
Katkum kine ki Office Memorandum bad ki jingbthah, ha ka jylla Meghalaya ka jingbhah kyrpang ka long tang 1 % ïa ki Scheduled Castes, 44% na ka bynta ki Scheduled Tribes bad 5 % na ka bynta ki Other Backward Classes.
“Ngi ïoh jingtip ba bun na ki ophis ka Sorkar Pdeng kiba don hapoh kane ka jylla Meghalaya kim shym la bud katkum ka jingkdew ha ka Office Memorandum bad bun na ki samla riewlum ki la duh noh ïa la ka hok ban rungkam ha ki ophis ka Sorkar Pdeng na ka daw ka jingbym bud ïa kaba la kdew ha ka Office Memorandum,” ong u Bah Synrem bad bynrap ba u Myntri u la kular ba un sa shimkhia ïa kane bad ki bor ba dei peit.
Shuh shuh u Bah Synrem u la ong ba seng ka la kyntu ïa ka Sorkar ban shim ïa ki lad ki lynti ban pynthikna ka Fast Track Courts/Special Courts katkum ba la bsut hapoh ka DREAM Project, na ka bynta ban tian bishar ïa ki case hapoh ka NDPS Act dei ban leh kham kloi katba lah, khamtam ha East Khasi Hills District.
“Ïa mynta ym don wat tang kawei ruh ka Special Courts ban tian bishar ïa ki case hapoh ka NDPS Act, namar kata ki jingtian bishar ki shu sah lyngkran da ki snem bad kane ka pynduh mynsiem khamtam ïa ki nongsakhi bad ïa ki paidbah ban ïarap ïa ki tnat treikam ka Sorkar ha kaba ïakhun pyrshah ïa u drok,” u la ong.
U la ai khublei ruh ïa ka tnat Social Welfare kaba la pynbna paidbah ïa ka Drug Reduction, Elimination, and Action Mission (DREAM) ha ka 27 tarik, Jylliew, 2023 da kaba buh hakhmat ïa ka thong ban pynlong ïa ka jylla kaba lait, na u drok,” bad ong, “ka dei ka polisi kaba donkam, khlem pep, da kaba buh ïa ka thong ban rat dyngkhong ïa u jingdih ba sniew bad ban pynlong ïa ka jylla kaba lait na ka jingshah teh mraw ha u drok. Hynrei kaba pynsngewkhia ïa ngi ka long ba kane ka Mission/Policy kam dei ban long tang kum ka dulir jong ka Sorkar kaba don tang ha ka kot sada hynrei ka bym lah ban pyntreikam katkum ka jingthmu.”
Une u nongïalam ka HYC u la ïathuh ruh ba ka seng ka la kyrpad ïa ka Sorkar ban pyntreikam ïa ka Prevention of Illicit Traffic in Narcotic Drugs and Psychotropic Substances Act, 1988 (PIT-NDPS Act).
“Ngi kyntu ïa phi ban shim ïa ki lad ki lynti ban kyndang naphang pyrshah ïa ki snar nongkhaïi da kaba kem bad pynngat kyndon ïa ki nongleh kam sniew/nongkhaïi, kiba la shah kem bun bun sien, hapoh ki kyndon jong ka PIT-NDPS Act,” u la ong.
U la bynrap ba ka Sorkar Jylla ka la thaw ïa ka Advisory Board katkum ka jingbthah jong ka PIT-NDPS Act, 1988 bad haduh mynta hadien ka jingai jingmut, tang 9 ngut ki briew kiba donkti ha ka jingkhaïi drok kiba la shah kem hapoh ki 3 snem.
“Ngi kyrpad ïa ka tnat ba kan pynshitom pyrshah ïa ki nongpynkheiñ aiñ,” la ong u Bah Synrem.
