Kam ka NHAI ba la shna ïa ka surok NH-6, kynnoh ki Waheh Shnong ba ai da ka kaiphod thok

Khliehriat, Naiwieng, 29: Ki Waheh Shnong bad ki Secretary Shnong jong ka thaiñ Narpuh ki la pyneh triang hakhmat u Deputy Commissioner jong ka East Jaiñtia Hills District bad kim shym la ailad ban plie biang ïa ka Toll Gate jong ka National Highway Authority of India (NHAI) kaba don ha Lumshnong kaba la khang khyrdep mynta la kumba lai bnai.
Ïa kane ka jingïalang la khot da ka Extra Assistant Commissioner (EAC) jong ka East Jaiñtia Hills District.
U Secretary Shnong ka Sonapyrdi, u Bah Daïapherbha Lamare, u la ïathuh ba ki bor synshar jong ka District ki pynsngew ba ka jingkhang ïa ka Toll Gate ka la ktah ïa ka jingïohnong jong ka NHAI.
“Ngin ym shah ban plie ïa ka Toll Gate ha Lumshnong katba ka NHAI kam pat maramot bha bad siang rong bha ïa ka surok ha ka thaiñ bad ha shilynter jong ka surokbah NH-6,” ong ki Waheh Shnong bad Secretary Shnong na ka thaiñ Narpuh.
Ki nongïalam shnong kiba la don lang ha kane ka jingïalang ha ka sngi Balang, ki la pynpaw ruh ka jingsngew lyngngoh halor ka kaiphod ba ki la phah sha ki bor district ba la pynsngew da ka Assiatant Extra Commissioner ba ka NHAI ka kam ba ka ladep ban maramot ïa ka surok haduh 80 percent. Ki nongïalam shnong ki la khie bitar ïa ka kaiphod jong ka NHAI bad ong ba kane ka dei tang ka ktien thok ktien shukor namarba ki Kontraktor kiba pyntrei ïa kane ka surok NH-6, haduh mynta ka jingpyntrei kam pat kot satia wat tang 10 percent ruh.
Ki nongïalam shnong ki la ong bad kren da kaba shai hakhmat ka Extra Assistant Commissioner (EAC) bad ïa ki ophisar jong ka NHAI lada kim lah ban pyndep ïa ka jingmaramot bad jingsiang rong ïa ka surok haduh 80 haduh 90 percent kin nym ailad da leilei ruh ban plie ïa ka Toll Gate ha Lumshnong
Bah Daïapherbha Lamare u la pynpaw ka jingbitar ïa ka jingleh ki ophisar ka NHAI kiba la shu ai ïa ka kaiphod ka bym shongnia bad ka kaiphod kaba thoh sha u Deputy Commissioner ka East Jaiñtia Hills District ha kajuh ka por u kyntu ïa ki bor synshar jong ka East Jaiñtia Hills District ba kim dei satia ban ngeit ïa kane ka kaiphod jong ka NHAI bad ong ruh ba nangne shakhmat ki bor synshar district ki dei ruh ban pan ïa ka kaiphod na ki nongïalam shnong jong ka Narpuh ha kaba ïadei bad ka jingpyntrei bad siangrong ïa ka surokbah NH-6 kaba naduh Mynkre shaduh Malidor, namar katkum ka jinglap la sngewthuh shai ba ki heh jong ka NHAI ki la shu ai da ki kaiphod thok sha ki bor synshar district.
Na ka daw ka jingpyneh ki bor synshar shnong jong ka elaka Narpuh, ka jingthmu jong ka NHAI ban plie biang ïa ka Toll Gate ha Lumshnong ka la shu pulom.
Wat ka Dorbar Shnong Umkiang ruh lem bad ki nongshong shnong ki la byrngem ban mih sha surok ban ïakhih pyrshah namar ka jingleh mynthi jong ka Sorkar bad ka NHAI ha kaba ïadei bad ka jingmaramot bad siang rong ïa ka surokbah NH-6 ha ka thaiñ.