Nongpoh, Rymphang 13: Kum uwei na ki samla ka them Ri Bhoi, u samla Albert Maring na ka shnong Umdap Dumu, u la mih shakhmat ban pynpaw ïa ka jingsngewkhia kaba la wan rah ka huri hura, ka jingïabeiñ ïa khoh tang na ka daw ka election MDC, ba sa tang da ki sngi ki paidbah ka Rilum Khasi-Jaintia kin sa jied ïa kito ki nongmihkhmat sha ka ïing Dorbar thaw aiñ ha KHADC bad JHADC ka ban sa long ha ka 21 taraik u Rymphang 2025.
Haba kren sha ki lad pathai khubor, u Samla Albert Maring, u la ong ba kum u samla u kwah ban pynpaw pyrthei ïa ka jingsngewkhia, ba tang na ka daw ka election ki mih ki jingïakawang ktieh bad kaba la ktah ruh ïa ki longïing longsem, ka imlang ka sahlang, ba ha kane ka jingïalap election ki mih tang ïa ki jingïabeiñ ïa khoh, ha ka jaka ba kin kren ïa ka nongrim.
U la ong ruh ba u dap shisha da ka mynsiem jong ka jingsngewkhia haba sakhi ha kane ka jingïalap election ba la jur kata ka jingïakawang ktieh iwei ïa iwei, ka jingïabeiñ ïa khoh bad kane ka la ktah ïa kiba bun ki longïing longsem, ka shongsuk shongsaiñ ba ki mih ki kynrum ki kynram tang na ka daw ka election’
“Kum ki nongshong shnong ngi hap ban sngewthuh ba ka jingdon ka election ban jied ïa kita ki nongmihkhmat ka long ba ngi hap ban da bishar bniah ban jied ïa kita ki nongïalam kiba don shisha ka jingkitkhlieh bad kaba sngewlyngngoh pat ba tang na ka daw ka kam sain hima sima, ka la rung sha ïing ka sem, ka imlang ka sahlang bad ruh wat sha ki Balang” ong u Samla Albert Maring bad bynrap ruh kum ki paidbah ngi hap ban sngewthuh ba tang na ka daw ka election kam dei ban ktah ïa ka longïing longsem, ka Balang bad ïa ka imlang ka sahlang, ha kaba lada da mih tang ki jingïabein ïa khoh ne ka jingïakawang ktieh ka ktah ïa ka shongsuk shongsain ki paidbah” u la bynrap.
Namarkata, kum uwei na u Samla na ka dong Ri Bhoi, u Samla Albert Maring u la kyrpad naduh ki political party bapher bapher, ki kyrtong bad ki nongïalam ba kim dei ban wan rah politic ha ka imalang ka sahlang da ka jingïabein ïa khoh ne ka jingïakawang ktieh ha ka por ba ïalap election, namar kane ka ktah shisha ïa ka shongsuk shongsain ki paidbah bad kum u samla u la kyntu ruh ba lada ngi jied ïa kita ki nongmihkhmat ngi dei ban jied da ka jingstad bad ruh ban pynlong ba kane ka election jied nongmihkhmat sha KHADC bad JHADC ka dei ban long kaba ïaid beit ïaid ryntih khnang ba kan nym ktah ïa ka imlang sahlang hi baroh kawei, u la bynrap.
