Bunsien dei ka jingbret pathar ïa ki jaboh kaba kah ïa ka lynti ïaid jong ka um

Nongpoh, Naitung 15: Ban wad ïa ki lad jingïada kiba paka bad kiba neh na ka jingshlei um kaba ju jia man u snem ha ka thaiñ Jorabat-Khanapara, u Deputy Commissioner ka Ri-Bhoi District, u Dr. Abhishek Saini, mynta ka sngi u la lum ïa ka jingïalang bad ki heh ophisar jong ki tnad sorkar bapher bapher ka Ri-Bhoi District.
Ha kane ka jingïalang la ïashim bynta da ki ophisar na ka National Highways Authority of India (NHAI), Public Works Department (PWD), Water Resources Department, Police Department, District Disaster Management Authority (DDMA), Soil & Water Conservation Department, Forest Department, bad kiwei kiwei ki tnad, ryngkat bad ki heh ophisar na ka North Eastern Space Applications Centre (NESAC).
Haba kren sha ki lad pathai khubor hadien ka jingïalang, u Dr. Abhishek Saini u la ong ba ha kane ka jingïalang la ioh ban ïakren sani bñiah halor ki sienjam kiba dei ban shim mardor bad ruh ki lad jingïada kiba neh na ka bynta ban pynduna ïa ka jingshah ktah jong ki paidbah na ka jingshlei um kaba la jur kumba la jia ha kine ki khyndiat sngi ba la dep.
U la ong ba watla ki don shibun ki sienjam kiba la dep ban pyntreikam ha ki snem ba la leit, hynrei mynta ka long kaba donkam ban pynsted ïaka jingpyntreikam khnang ban lah pynduna ïa ka jingeh kaba ki paidbah ki ju mad man ka por ba jur slap.
Napdeng ki rai ba la shim ha kane ka jingïalang ki long ban pynheh bad ban pynkhuid man ka por ïa ki nala, bad ban tei ïa ki check dam bad kiwei pat ki jingtei ha ki jaka ba donkam hadien bala ithuh kyrpang ïaki jaka ba shah ktah jur naka jingshlei um khnang ba yn lah ban leh eiei kham kloi.
Ha kajuh ka por, u la kyrpad ïa ki paidbah ban ai ka jingïatreilang bad kim dei ban bret jaboh kulmar kat shaba lap ba shem, namar la lap bunsien ba ki jaboh ki kah ïa ka jingtuid jong ka um bad kane ka wanrah ïa ka jingshlei um haba jur slap.
U Dr. Abhishek Saini u la ong ba naka liang ka bor district ka angnud ban wanrah ïa ki lad jingïada ki ban neh slem ba ki paidbah kin nym shah ktah hadien habud bad lait naka jingshlei um.