Kyntu u Myntri sorkar pdeng ban pyntreikam bha shuh shuh ïa ki skhim ha Ri-Bhoi

Nongpoh, Naitung 14: U Myntri Khynnah ka Sorkar Pdeng uba peit ïa ka Ministry of Earth Sciences bad ka Ministry of Science & Technology, u Dr. Jitendra Singh, mynta ka sngi u la pynlong ïa ka jingïalang bad ki khlieh ophisar jong ki tnad sorkar bapher bapher ha Ri-Bhoi District ban buddien ïa ka jingpyntreikam bad ka jingïaid shaphrang jong ki skhim bapher bapher ka Sorkar Pdeng ha Ri-Bhoi, kaba dei ka Aspirational District ha jylla Meghalaya.
Ïa kane ka jingïalang la pynlong ha North Eastern Space Applications Centre (NESAC), Umiam, ha kaba la donlang ruh u Deputy Commissioner ka Ri-Bhoi, u Dr. Abhishek Saini, u Superintendent of Police, u Giri Prasad, u Additional Deputy Commissioner, Bah Jonathan Shylla, lem bad ki khlieh ophisar na ki tnad Sorkar bapher bapher jong ka district.
Ha kane ka jingïalang, u Deputy Commissioner, u Dr. Abhishek Saini, u la ai ka jingbatai kaba bñiah halor ka jingïaid shaphrang jong ki kam pynroi ha Ri-Bhoi lyngba ki skhim bapher bapher ka Sorkar Pdeng. U la pynpaw ba ka district ka la sakhi ïa ka jingkiew ha kiba bun ki bynta, kynthup ïa ka koit ka khiah, ka rep ka riang, ka pule puthi, ka umbam umdih bad ka jingpynroi ïa ki shnong nongkyndong.
U la pyntip ruh ba la sam ïa ki Health Card sha ki nongrep naka bynta ka jingmyntoi jong ki bad la pyntyllun ruh shibun ki projek ban pynbha ïa ki surok, bad kiwei kiwei ki kam pynroi.
Haba kren ha ka jingïalang, u Dr. Jitendra Singh u la pynpaw ïa ka jingsngewkmen ban ïoh ïakynduh bad ki ophisar ka Ri-Bhoi bad u la ai jingïaroh ïa ka jingtrei shitom jong ki ha kaban pyntreikam ïa ki skhim ka Sorkar Pdeng. U la ong ba ka jingïatreilang bad ka jingaiti lut jong ki ophisar ka long kaba donkam bha ban wanrah ïa ka roi ka par kaba pura ha ka district.
U Myntri u la kyntu ruh ïa ki ophisar ba kin dang bteng ban trei shitom bad ban wad ïa ki buit treikam kiba thymmai bad kiba seisoh khnang ba Ri-Bhoi, kum ka Aspirational District, kan nang kiew shaphrang ha baroh ki liang bad ba ki jingmyntoi jong ki skhim ka Sorkar Pdeng kin poi sha ki paidbah.