Pan kaiphod ka HC na ka SMB halor ka jingsam ïa ki dukan sha ki nongdie madan ha Brightwell Bungalow

Shillong, Naitung 14 : Ka ïing Bishar High Court jongka jylla ka la bthah ïa ka Shillong Municipal Board (SMB) ba kan aiti ïa ki jingtip ba bniah halor ka jingshna bad jingsam ïa ki dukan na ka bynta ki nongdie madan ha phyllaw ka Brightwell Bungalow.
Haba bishar ïa ka mukotduma ki PIL ha ka Lah Sngi U Blei ka ïing Bishar ba la khlieh da ka Chief Justice Revati Mohite Dere bad Justice W Diengdoh, ka la bthah ïa ka SMB ba kan file ïa ka affidavit ba pynpaw ba katno tylli ki dukan kin don, ha katei ka jaka bad kaei ka por ba la buh ban pyndep bad aiti sha ki nongdie madan.
Ka ïing Bishar ka la bthah ruh ïa ka SMB ban pynshai la ka phyllaw ka Brightwell Bungalow ka dei ka jingtei kaba la rim, hadien ka jingpyrshah da ki katto katne ki nongmudui.
U nongiasaid aiñ ki katto katne ki nongmudui ula pyntip ïa ka ïing Bishar ba ka jaka ka don ïa ka jaka kaba heh na ka bynta ki dukan bad ki jaka pynïeng kali bad kim don ruh ïa kano kano ka jingpyrshah ban pynkynriah ïa ki nongdie madan ha katei ka jaka.
La bthah ïa ka SMB ba kan ai ïa ka affidavit hapoh ka Registry ryngkat ka jingai copy sha baroh ki kynhun liang mamla.ïa kane ka mukotduma la buh ban bishar biang ha ka 29 tarik Naitung, 2026.