Duh ei ïa ka jingim jong ki lai ngut ki khynnah ba dkut u sainar elektrik ha shnong Umranglin

Shillong, Naitung 15 : Lai ngut ki khynnah ki la duh ei ïa la ka jingim na ka jingshah bat ha ka bording elektrik ha ka shnong Umtangling, kaba hap hapoh ka Umiam Police Station, Ri-Bhoi District.
Kane ka jingjia kala jia mynta ka Sngi Balang ha ka por 2 baje nohphai sngi. Kane ka jingjia ka la wan jia hadien ka jingdkut jong u sainar elektrik ba 11 KV ha ka surok ba ki dang ïaid. Kine ki khynnah kim shym la ïohi ïa u sainar ba hap bad lam sha ka jingshah bat ha ka bording.
U Rangbah Shnong ka Umtangling u Bah Bok Nongbsap, ula ïathuh ba kine ki khynnah ha ka jingbym tip ba hap utei u sainar elektrik, ki la leit ïaid sha katei ka jaka bad ki la shah bat ha ka bording haduh ban da duh syndon ïa ka jingim.
U ïathuh ba napdeng kitei kiba khlad 3 ngut, uwei u dei u heprit ba dang 11 snem bad u hynmen ba 12 snem.
U Bah Bok u ïathuh ba shuwa kane ka jingjia ba sngewsih, ula dep ban ujor sha ka Tnad MeECL ïa ka jingdon ki sainar kiba la jan dkut ha katei ka shnong bad ruh ïa ka jingsniew u transformer haduh ba ki nongshong shnong kila hap shong dum la shitaiew eiei.
U la kynnoh ba ka MeECL ka khlem shim khia eiei ïa kane ka jingujor.