Mawkyrwat, Rymphang, 13: Ka Tyngnger Upper Primary School jong ka Balang Presbyterian Tyngnger District, East Khasi Hills District ha ka sngi Balang ka la rakhe ïa ka jingdap 75 snem ban ai ka jingshakri ïa ki paidbah lyngba ki jinghikai ha ka liang ka jingnang jingstad ïa ki khynnah ha ka thaiñ.
ïa kane Tyngnger Upper Primary School la seng da ka Balang Presbyterian Tyngnger District naduh u snem 1950. Kan long ka sngi kaba sah jingkynmaw lyngba ki ‘riew rangbah na ka Balang Presbyterian kiba la don ka jingïohi jngai ban seng ïa ka Tyngnger U.P. School kaba dei kawei ka shlem pule kaba la pynmih shibun ki ‘riew khlur ba phyrnai na ka thaiñ baroh kawei.
U MLA ka Mawsynram Constituency u Bah Ollan Sing Suiñ uba la long u kongsan u la pynher ïa ka lama kum ka dak ka jingplie ïa ka jingrakhe 75 snem bad ïa kane ka jingrakhe yn sa pynhap pyrda ha ka 4 tarik, Nohprah, 2025.
Haba kren kum u kongsan, u Bah Suiñ u la ong ba ka 75 snem ka dei ka sngi jong ka jingop bad mynta ka dei kumno pat ngin tei ïa ka bad nangne shakhmat ban sei shuh shuh ïa ki riewkhraw na kane ka skul, ki shlem ai jingnang jingstad jong kiba wanrah nyngkong ha kane ka ri khasi dei lyngba ki mishon jong ki kynhun niam bapher bapher ba lyngba jong ki ngi ïoh shibun ki jingkyrkhu la ha ka jingnang jingstad ne ha ka akor ka burom.
Namarkata, ka shong sa ha kane ka pateng jong ngi kumno ba ngin nang ban pynjanai shuh shuh ïa kaei ba ki Missionary ki la wanrah ha kane ka ri khasi, u la bynrap.
Ha kane ka sngi pynïaid ïa ka jingïalang da u Rev. S. Syiemsad bud ka jingïathuh ïa ka history lyngkot jong ka skul da u Secretary jong ka Managing Committee T.Bn. B.L. Jeengaph ki jingrwai na ki khynnah skul bad ka jingduwai na u TBn. B.B. Wahlang ha ryngkat ka jingïadonlang ki nonghikai ba la shongthait ki ‘riew rangbah ba la shah khot sngewbha bad ki paidbah ka thaiñ Tyngnger.
